Shillong, Risaw 14: Ka Shillong Sports Association ka la ïoh ban pynlong ïa ka jingïalang kaba kyrpang lane la Annual General Meeting jong ka synjuk ha ka 11 tarik u Risaw, 2025.
La pynbna ruh da u President ka SSA u Bah Banteidor Lyngdoh, MLA ka Mawkynrew, ba ka SSA ka lah ban pynim biang ïa ka Shillong Games, kaba don san tylli ki jait jingïalehkai, ba la thmu ha u bnai Nohprah.
ïa kane ka jingïalang la pynïaid da u President ka SSA, Bah Banteidor Lyngdoh ha ka jingïadon lang ki dkhot nongkitkam jong ka SSA bad ki nongmihkhmat jong ki klob kiba la dep ban ïasoh bad kane ka synjuk.
Kane ka jingïalang ka sdang da ka jingïa sngapjar kaba 2 minit na ka bynta u Bah SS Rapthap, u Vice-President SSA, uba la khlad noh ha kaba sdang jong une u snem.
Hadien kane la wanrah ïa ka kaiphod ba man la u snem da u General Secretary ka SSA u bah Dipshon L Nongbri na ka bynta u snem 2024-25. La ai ruh ïa ka kaiphod pisa ba la audit na ka bynta u snem 2024-25 da u Treasurer ka SSA u bah Prosper Warjri.
Ki dkhot kiba la don lang ha kane ka AGM ki la ai jingmut ba dei ban pynrung ïa ki khusnam shimet, kum ka khusnam ‘Player of the Tournament’, ‘Best Goalkeeper’, Top Scorer, bad kiwei kiwei, na ka bynta ki lympung ïalehkai phutbol jong ka SSA. Nalor kata, la thung ruh ïa ka P Rangslang jong ka Mawpat SC kum ka nongmihkhmat kynthei ha ka SSA Council. Ka SSA ka la pynthikna ruh ïa kito kiba don lang ba kan pynlong ïa ki lympung phutbol man la u snem na ka bynta ki khynnah bad ki samla.
La ïoh ruh ban ïakren halor ka jingpyntreikam ïa ka All India Football Federation’s Central Registration System na ka bynta ki nongïalehkai bad ka jingpynbeit ryntih da ka SSA ïa ki lympung ïalehkai ryngkat bad ki jingbthah ban pynthikna ïa ka jinglong kaba janai.
