Ha ka 27 tarik Nailur yn pynlong ka MSOA ïa ka 4th Sohra International Half Marathon 2025

SHILLONG, Naitung 07: Ka Meghalaya State Olympic Association [MSOA] ka la pyntip ba kan pynlong ïa ka Sohra International Half Marathon 2025 ha ka 27 tarik u Nailur ,bad na ka liang jong ki nongpynïaid ki la khmihlynti ba ka jingwan ki nongïashim bynta kan kot palat ïa ka 10,000 ngut mynta u snem.
Kane ka jingïakop mareh, ka ban kynjoh mynta ha ka sien pynlong kaba saw, ka dei kaba la ithuh da ka Athletics Federation of India (AFI) bad ka World Athletics, bad la pynlong ïa ka da ka Meghalaya State Olympic Association bad ka Meghalaya Athletics Association, ha ryngkat ka jingïatreilang bad ka tnad Sports jong ka Sorkar Jylla.
Ka Sohra International Half Marathon ka kynthup ïa ka 21K Elite Open (18 snem shaneng), 10K Open (18 haduh 59 snem), bad ka 5K Run for Fun na bynta baroh kynthei bad shynrang , kaba khring ïa ki nongïashim bynta bapher bapher, naduh kiba dang khynnah haduh kiba la rangbah.
Ka lynti ban mareh ka dang neh kumjuh kumba ju long ha ki snem ba la dep, kaba sdang na Laitsohpliah kaba don 6 km ha khmat jong ka jingkieng Mawkdok bad ban pynkut ha Mawsmai (Nohsngithiang Falls viewpoint).
Haba pynshai sha ki nongthoh khubor, u DD Shira-MCS, Director jong ka tnad Sports & Youth Affairs ka Sorkar Jylla, u Bah John F Kharshiing-Working President ka MSOA, bad u Bah Finely Pariat-General Secretary ka MSOA, ki la khot sngewbha ïa ki nongïalehkai na Meghalaya ban ïashim bynta ha kane ka lympung.
“Ngi kyrmen ba mynta u snem kan long kaba jop. Ka tnad ïalehkai ka ïatreilang bad ki khlieh nongsynshar shnong bad ki Dorbar Shnong ha Sohra ban pynthikna ba kane ka jingïalehkai kan long kaba jop,” la ong u D. D. Shira, Director ka tnad Sports, ha kaba u la ai ruh ka jingïaroh ïa ka ophis treikam jong ka Sohra sub-division, ki pulit, bad kiwei kiwei ki tnad kiba la ai ka jingkyrshan.
Kumjuh ruh na ka liang jong u Bah John F Kharshiing, uba dei u Working President ka MSOA, u la kyntu ïa ki briew na ka jylla Meghalaya bad shabar, ba kin pynrung kyrteng hapoh ka 10 tarik u Nailur, 2025, da kaba bynrap ba ka Sohra Half Marathon ka thmu ban kyntiew ïa ka koit khiah, ïa ka jylla, bad ïa ka kam jngohkai pyrthei.
Ha u snem ba ladep ka Sohra Half Marathon ka la ïohi ïa palat 7000 ngut ki nongïashim bynta ha kaba u General Secretary ka MSOA, u la kynthoh ba mynta u snem, la khmihlynti ïa palat 10,000 ngut ki nongïashim bynta.
Shuh shuh u la ong ba ka Sohra Half Marathon ka long ruh kum ka lad ban kyntiew ïa ka Sohra kum ka jaka jngohkai kaba pawnam.
“Ka mang tyngka baroh, kaba kynthup ïa ki jinglut jingsep ban pynbit pynbiang ka long T.2 klur. Kane ka marathon ka long kaba rem dor hynrei kaba ai ïa ka khusnam kaba heh tam haba ïanujor bad kiwei pat ki Jylla ka thaiñ shatei lam mihngi,” u la bynrap.
U la pynshai ruh ba na ka bynta ki nongshong shnong jong ka Sohra kiba ïashim bynta ha ka 5K Run for Fun ym nym shim bai rung bad pynbna ba baroh ka khusnam pisa jong kane ka marathon ka long T.15.50 lak. Yn ai khusnam kyrpang sha ki nongialehkai kiba la palat ïa ka 50 snem kiba pyndep ïa ka jingmareh kaba 21K.
Ban pynthikna ba kane ka Marathon kan ïaid beit ïaid ryntih, ki surok kiba leit sha Sohra na Shillong kin khang naduh ka por 6 baje mynstep haduh 10 baje mynstep ha ka sngi mareh. Yn pynbiang ïa ka leit ka wan khlem jingsiew na ka bynta baroh ki nongïashim bynta. Ki nongïashim kin mih na Shillong ha ka por 3 baje mynstep, ban poi sha Laitsohphliah, ka jaka kaba la pynkhreh ban sdang ïa ka jingïamareh.
Ka jingpynrung kyrteng kan plie lyngba ka online bad offline, ha kaba ka jingpynrung kyrteng na ka bynta kiba thep offline kan long ha ophis jong ka MSOA kaba don marjan ka JN Stadium, Shillong, bad ha dukan Sohra kaba don hajan ka Petrol Pump ha Lad Thanad. Ka bai rung ka long T. 1,000 na ka bynta ka 21K, T. 200 na ka bynta ka 10K, bad 50 tyngka na ka bynta ka 5K Run for Fun. Ka tarik ba khatduh ban pynrung kyrteng kan long ha ka 10 tarik u Nailur, 2025.
Na ka bynta ki sopti (T-shirt) bad ki bib number jong kito ba mareh ïa ka 21K bad 10K yn sam ha ka 25 bad 26 tarik Nailur, 2025, ha JN Stadium, Polo. Ki nongïashim bynta ha ka 5K Run for Fun na Shillong bad ki jaka ba marjan ki lah ban leit shim ïa ki jingdonkam jong ki ha ka 26 tarik u Nailur, 2025, ha kajuh ka jaka, katba kiba na Sohra ki lah ban leit shim ïa ki na Sohra ha kajuh ka sngi.