Ha jaka ban ïarap ïa ki nongri masi ka Sorkar ka pyntieng pynban ban bam doh bad dih dud : Ardent

Umsning, Jylliew 18: U President ka Vice of the People Party (VPP) u Bah Ardent M Basaïawmoit ha ka sngi Saitjaiñ u la kynthoh ïa ka sorkar halor ki sienjam kiba ka shim hadien ka jingwan lynshop ka jingpang sniehdoh ki masi (Lumpy skin disease) da kaba ong ba ka sorkar jylla ha ka jaka ban shim ïa ki sienjam ban ïarap ïa ki nongri masi hynrei ka shu pyntieng pynban ïa ka paidbah ban bam doh bad dih dud.
“Ka sorkar aoi kaba kum kane ha jaka ban ïarap ïa ki nongrep ka shu pyntieng pynban ïa ki paidbah da kaba pynmih hukum ba ym long shuh ban bam doh bad ban dih dud ha kaba ki nongri jingri khamtam eh kiba ri masi khemdud ki la shu hap ban theh kai sha khyndew ïa ka dud namar ki paidbah kim nud shuh ban dih dud,” ong u Bah Ardent ha ka jingïalang ba la pynlong ha Umsning.
“Ha ka jingshisha ka sorkar lyngba ka tnat Animal Husbandry & Veterinary ka dei ban leit sha madan ban lum jingkheiñ katno ki masi ki don kiba shah ktah kiba ym long shuh ban shohdoh ne ban dih ïa a dud jong ki na ka jingshah ktah na kane ka jingpang bad katno kiba koit ba khiah namar ym baroh ki masi ki pang hynrei ka jingpynmih beit beit tang ha hukum ka ktah shisha shisha ïa ki nongrep,” u la bynrap.
U la ong ruh ba na ka liang ka VPP ha kine ki sngi kiba wan kan sa leit ban buh jingthoh sha ka sorkar ha kaba ïadei bad kane.