Ha jaka ba 50 akar thmu tei ïa ka Shillong Medical College, yn kren bad ka kynhun ba thymmai

Shillong, Nailur 13 : Ka jingkhim palat ka jaka barim kaba don ha Mawbah, TB Hospital, ka sorkar jylla mynta ka la ai da ka jaka kaba heh 50 akar ha New Shillong Township ban pynieng ïa ka Shillong Medical College, ong u Myntri ka tnad ka Koit ka Khiah ka jylla, James K Sangma haba jubab ha Iing Dorbar ha kane ka sngi Ba-ar.
“Kadei ka jaka kaba kham heh kaba lah ban tei ruh ïa ka hospital kaba 100 jingthiah nalor kiwei kiwei ki jingtei,” u la ong haba jubab halor ka jingkylli ba wanrah da u MLA ka North Shillong Bah Adelbert Nongrum ha ki kynta kylli jingkylli.
Shwa kane, u Myntri u la pyntip ruh ba ka jaka kaba rim kaba don ha Mawbah, TB Hospital ka kham khim bad kam ïahap bad ki kyndon na ka bynta ban tei ïa ka Medical College khamtam eh naba ka surok ka long kaba khim. U Myntri u la pyntip ruh ba ka sorkar ka la pyrshang da kiwei pat ki lad ban ïa soi soskular ha ka rukom jong ka PPP Mode bad kiwei ki kynhun ryngkat ka jingkyrshan bad ka NITI Ayog ban sdang ïa katei ka Medical College.
Kumban shu kdew hangne ba ïa u mawnongrim ban tei ïa ka Medical College ha RP Chest, TB Hospital la buh hadien ka jingïasoi ïa ka soskular bad ka KPC Group ha u snem 2012.
“Ka sorkar ka la shim bun ki sienjam ban pyntikna ba kane ka projek kan urlong noh ha jaka ba kan neh tang ha kawei ka jaka. Ngi la ïa kren ruh bad ki kynhun ba thymmai kaba lah ban ai ka jingtreikam kaba kham bha,” bynrap biang u Myntri.
Shwa kane, u MLA ka West Shillong Bah Mohendro Rapsang u la kyntu ïa ka sorkar jylla ba kadei ban tei beit hangtei ïa ka Medical College khamtam haba ïa u mawnongrim ruh la buh hangtei.
Kumta halor kane, u Myntri pat u la kyntu ïa u MLA ba un pyrkhat lang ïa kane ka bynta ym tang na ka bynta ka constituency hynrei khamtam eh na ka bynta ka jylla hi baroh kawei.
Hadien kane, u Bah Rapsang ula kyrpad ïa ka sorkar ba namar ïa katei ka jaka la pyndonkam na ka bynta ka koit ka khiah, kumta ruh kam dei ban ailad ba kin ieng noh da kiwei pat ki jaitkam.
Halor ka jingkylli kaba wanrah da u MLA ka Umroi ïa ka daw ba ka sorkar ka pyndam noh ïa ka soskular bad ka KPC Group, u Myntri u la ong ba ka jaka kadei kawei na ki mat jong ka jingbym mynjur.
La pyntip ba katei ka kynhun ka kwah shuh ka jaka na ka bynta katei ka projek bad ruh ban pynjlan ïa ka jingai wai na ka 30 snem sha ka 99 snem nalor ban kyntiew ruh ïa ka bai wan pule.