Ha ïingbishar High Court yn mudui ka HNYM pyrshah ïa ki trok ba kit palat pud

Shillong, Nohprah, 09: Ka Hynñiewtrep National Youth Movement (HNYM) ka la rai ban phah da ka jingthoh sha u Registrar jong ka ïingbishar Meghalaya High Court ha ka Lah Sngi U Blei jong ka taiew ban wan pyrshah ïa ki trok ba kit palat pud kiba pynkheiñ ïa ka hukum jong ka tnat Transports bad ka Deputy Commissioner jong ka East Khasi Hills District ba la mana ban ïaid lyngba na ka surokbah ba pynïasoh da ka jingkieng Damsite.
Haduh 42 tylli ki trok ba kit ïa u mawleiñ, u mawshun, u dewiong, u coke ki la shah bat ha ki Pulit jong ka Mawlai Police Station ha ka step Sngi Thohdieng da ka jingujor jong ka HNYM katba ki dang ieng laiñ naduh Mawlai Nongkwar ter ter shaduh Ryndang Briew. Ka Seng ka la mudui da ka ejahar pyrshah ïa kine ki trok ba la kynnoh kit palat pud ha Mawlai Police Station bad ujor ruh sha u Superintendent of Police ka East Khasi Hills District.
U President ka HNYM u Bah Louis Dohtdong ha ka jingïakren bad ki lad pathai khubor u la kam ba kine ki 42 tylli ki trok kiba la ïohbat da ka seng ki dei kiba kit palat ïa ka 20 ton.
U la ïathuh ba ka seng ha ka jingïakren bad ki Pulit pynïaid kali ki la kam ba ki la ïoh jingbthah na ki bor bahalor ban pyllait tang kawei kawei ym ha kajuh ka por.
“Ngi la ïakren ruh bad ki dalal ba pynïaid ïa ki trok kit dewiong bad ngi la ong ba ki dei ban pyrkhat lem ïa ki parari kiba shong basah ha them Ri Bhoi namar lada ka jingkieng ka twa kan ktah ïa ka jylla baroh kawei namarba ïa ka ri Khasi baroh kawei la tan bording na ka pung Umïam,” u la ong.
“Ka seng ka pynrem jur ïa ki heh spah ki bym kheiñ snep ïa ki parari ha them Ri Bhoi bad shwa ban jia ka jingïap kiba lui lui, ngi kyntu ïa ka tnat Pulit bad ïa u Commisioner jong ka Transports ban phah ïa ki MVI manla ka sngi,” u la ong.
“Ngi la kyrpad ban buh lai tylli ki Point ban peit ngor ïa ka jingïaid jong ki trok kiba kit palat pud, kawei ha Umshyrpi, kawei ha ISBT bad kawei ha Polo. Ka tnat Transport kam dei ban shu hun tang ban shu pynmih ïa ka Notication hynrei shaei ki MVI ki jah, bad ka hukum ba la pynmih da ka DC ruh ka dei ban pyntreikam pura,” u la ong bad bynrap da kaba ong, “kine ki trok ki ïaid manla ka sngi, shaei kane ka hukum ba la pynbna hynrei kim leh eiei pat.”
“Ha ka taiew ba ladep ngi la ïakren bad ki nongpynïaid kali ba ki dei ban pynïaid ïa ki trok na Mawryngkneng hynrei ki don pat kiba ïaid tuh na surok Mawlai Byepass. Hadien ba ngim lah shah shuh ïa kane ka jingkhwan myntoi jong ki heh spah kiba ki bym suidniew, ngim banse ban mih bad ban bat mynta ka step,” la bynrap u Bah Dohtdong.
Ka seng ka la pynpaw ruh ka jingsngewthuh ïa ka Officer-in-Charge jong ka Mawlai Police Station kaba la shimkhia ban phah mar mar ïa ki Pulit Traffic ban pynphai lut ïa ki trok na Ryndang Briew.
Shuh shuh u la ong ba ka seng kan sa leit buddien ïa ki 42 tylli ki Trok ba la bat da ki Pulit ka Mawlai Police Station ha ka Lah Sngi U Blei ka taiew ban wan. “Dei ban kurup lut ïa ki 42 tylli ki kali, lada pyllait ngin leit wad namarba ngi la ïakren bad u Superintendent of Police ba ka Seng kan ym ailad ba kawei ka trok ruh kan jah bad ngin sa buddien ha Mawlai Police Station bad ban pan jingtip la kine ki kali ki dang don neem hajuh,” la ong shuh shuh u Bah Dohtdong bad bynrap, “lada jah wat tang kawei ruh ngim banse ban ïaid da kawei ka lynti kaba tyngeh.”
“Kiei kita ki High Level bad ka seng kam pdiang ïa ki bad ngim tip hi ruh ki dei ki ei. Ki dei tang ki myntuh mynthiem bad kaei ka kyrdan jong ki ngim tip. Lada ngi lap sa shisien ngim bah khlieh,” la maham une u nongïalam ka HNYM.