Shillong, Lber 02 : Ka District Legal Services Authority East Khasi Hills ha ryngkat ka jingïatrei lang bad ka Meghalaya State Legal Services Authority ka la pynlong ïa ka jingai jinghikai paidbah ha Iew Sohra halor ka phang ban khanglad ïa ka shongkha khynnah hapoh ka jingpynïaid jong u Bah R. Thabah, PLV, East Khasi Hills, Shillong.
Na ka liang i Kong S Suting na ka District Child Protection Unit haba kren ha ka jingïalang i la pynshai ba ka jingshongkha hapoh 18 snem ïa ki kynthei bad 21 snem ïa ki shynrang ka dei kaba beain bad kumta i la kyntu ïa ki paidbah ba kin pyntip lada don kum kine ki jingpynshongkha jubor bad ruh lada don ka jingpyntrei bylla ïa ki khynnah ba dang rit. Ka la kyntu ruh ïa ki paidbah ba ki lah ban pyntip ha u Child Helpline 1908 ban ïoh ïa ki jingïarap kiba kyrkieh.
Ha kajuh ka por ka Kong V Diengdoh, WPSI na Police Department, ka la ïathuh ba ki jingjia kiba ïadei bad ka jingarmet ïa ki bym pat biang rta ki ngat ha ka kyndon Protection of Children from Sexual Offences Act (POCSO Act).
Kumta ka la banjur ba ka jingshongkha khynnah la khang pyrshah bad kdew ruh ba kane ka ktah wat ïa ka koit ka khiah bad ka pule puthi jong ki. La kyntu ruh ïa ki paidbah ba ki dei ban pyntip mardor ïa ki pulit ha u Police Helpline 112 ha ki jingjia kiba kyrkieh.
Na ka liang ka Kong Adella Kynta, Legal Advocate, ka la kren halor ka jingktah ha ki liang baroh kumjuh ïa ka koit ka khiah jong ka jingshongkha khynnah bad pyntip ruh ba ïa ki jingïarap haba ïadei bad ka ain ki paidbah ki lah ban ïoh khlem donkam siew na ka bynta ki longkmie bad ki khynnah kiba mad ïa ka jingshah thombor, ki paidbah ba dei na ki riewlum ST, kiba don jingthut ha ki dkhot met bad kumjuh kiba dei na kiba duna ka ïoh ka kot.
La pyntip ba na ka bynta ki jingïarap kiba ïadei bad ka ain ki lah ban ïoh lyngba ka Legal Services Helpline 1500.
Ka jingïalang ka la kut da kaba kyntu ïa ki paidbah bad ka imlang sahlang ban ïatrei lang na ka bynta ban pynduh jait ïa ka jingshongkha khynnah ha ka Jylla.
