Ha Dima Hasao pynïar thapbniang ka NPP, Pdiang sngewbha u Conard ïa u Daniel bad ki nongkyrshan

Maibang, Rymphang 12: Ka National People Party (NPP) mynta ka sngi ka la pdiang sngewbha ïa u nongialam ba pawnam jong ka dong ka thain Dima Hasao u Daniel Langthasa sha ka party ha ka jingïalang paidbah kaba heh kaba la long ha madan Dishru, Maibang.
Ïa u Langthasa la pynrung sha ka National People’s Party da u National President ka NPP uba long ruh u Myntri Rangbah ka Jylla Meghalaya u Conrad K. Sangma, ha ka jingïadonlang ki nongialam ba rangbah jong ka seng bad ki nongïalam ba paw jong ka thain.
Ha kane ka sngi la wan ban ïashim bynta da ki heh jong ka party kiba kynthup ïa u National Working President u James K. Sangma, u Vice President u Hemochandra Singh, u Nongseng jong ka Tipra Motha Party u Pradyot Manikya Debbarma, bad u myntri barim bad nongïalam na Nagaland u Mmhonlumo Kikon, ryngkat ki katto katne ngut ki nongïalam ba rangbah jong ka National People Party na kylleng ka thain shatei lam mih ngi.
U Langthasa u la pynïasoh bad ka party ha ryngkat bad ki nongkyrshan kiba bun jong u, kaba la pyni ïa ka jingkylla kaba khraw ha ka sain pyrthei haka thain Dima Hasao bad kane kala nang pynkhlain ïa ka party ha kane ka thain.
Haba ai jingkren ha ka jingïalang, u President ka NPP u Conrad K. Sangma u la pdiang sngewbha ïa u Daniel Langthasa bad ki nongkyrshan jong u sha ka long ïing jong ka NPP bad pynpaw ba kane ka jingpynrung ka pynpaw ïa ka jingshaniah jong ki briew ha ka jingthmu jong ka party na ka bynta ka roi ka par kaba don ïa paidbah riewlum, ki hok long ki trai ri trai muluk, bad ki jingangnud jong ki paidbah nongshong shnong. U la ban jur ba ka National People’s Party ka dang ïai bteng ban pynkupbor ïa ki jaidbynriew trai ri katba ka dang pynthikna ïa ka roi ka par kaba kynthup, ka jingpynbha ïa ka jingïadei, bad ki lad ki lynti kiba kham heh na ka bynta ki samla ha kylleng ka thaiñ Shatei Lam Mihngi.
U Conrad K. Sangma u la pynpaw biang ruh ïa ka jingkular ba ka seng ka ïa ka jingthmu ban pynlong tang “Kawei ka thaiñ Shatei Lammihngi” kaba kham khlaiñ bad kaba ïadei, ha kaba ki jylla bad ki jaidbynriew ki ïatreilang na ka bynta ka jingkiew shaphrang lang katba ki dang pynneh pynsah ïa ka pateng tynrai bad ka jinglong ba kyrpang jong ki.
Ki nongïalam jong ka party kiba la don ha katei ka jingïalang ki la kdew ba katei ka jingïalang ka dei ka dak jong ka jingkhie biang kaba khlaiñ jong ka National People’s Party ha ka thaiñ Dima Hasao bad ki la pynpaw ïa ka jingshaniah ba ki paidbah kin dang ïai bteng ban kyrshan ïa ka saiñ hima sima kaba buh hakhmat eh ïa ka jinglong kyrpang, ka burom, ka jingïatylli, bad ka roi ka par.
Ka National People’s Party ka la pynpaw ka jingsngewnguh ïa ki paidbah ka Dima Hasao halor ka jingïashim bynta kaba khraw jong ki bad ka la pynskhem biang ïa ka jingkular jong ka ban ïatreilang bad ki nongïalam shnong ban weng ïa ki jingangnud bad ki jingdonkam ha ka roi ka par jong ka thaiñ.