Ha Delhi kiba bun kim dei ki Khristan, hynrei ki pdiang ïa ka jingsynshar kaba khuid

Mairang, Nohprah 15: Ka Seng Voice of the People Party (VPP) mynta ka sngi kala pynlong ïa ka jingïalang ha Pyndemumïong, Mairang ban pynshai ïa ki nongrim ba ka Seng ka ïeng bad ban pan jingkyrshan ruh ïa u Kyrtong jong ka Party na Mairang Constituency, u Bah Shanlang Wajri.
Haba kren ha kane ka jingïalang u Bah Ardent Basaïawmoit, President jong ka Seng, u la ong ba ka jylla Meghalaya hapoh ka jingïalam jong ka sorkar MDA, ka la jyllei bad ngam ha ki kam bamsap bapher bapher bad donkam ban jied da kiwei pat ki Party ban wan ha ka bor synshar ha ka elekshon MLA 2023. Dei namar kane ka daw, u la ong ba ka kynhun ki riewshemphang, ba kynthup ïa ki nonghikai ha University, ha ki College bad kiwei kiwei de ki riewshemphang, ki la mih ban thaw ïa ka VPP ban wanrah ïa ka jingkylla bad ka synshar ka khadar kaba khuid ban rat diengkhong ïa ki kam bamsap ha ka jylla.
U Bah Ardent u la pynkynmaw ba ka Meghalaya kadei ka jylla kaba kiba bun ki nongshongshnong kidei kiba la long Khristan bad ka Bible ka kren pyrshah ïa ka jingbamsap. Hynrei balei pat ha kane ka jylla ba bun ki Khristan kaba la palat 73 percent ym ïapdiang ïa ka jingtyrwa ban wanrah ïa ka jingsynshar kaba khuid kaba lait na ka jingbamsap. “Lada ha Delhi kiba bun ki nongshongshnong kim dei ki Khristan ki pdiang ban wanrah ïa ka jingkylla sha ka jingsynshar kaba khuid, balei pat hangne ba bun ki Khristan bun ba ong leit lah shano ban ïaleh pyrshah ïa ka jingbamsap”, u la ong.
U la ong ba kum ki Khristan, lada ngi ong ba ym lah ban wanrah ïa ka jingsynshar kaba khuid ne ban ïaleh pyrshah ïa ka jingbamsap, kamut kam dei ka jinglong Khristan kaba shisha, hynrei kadei ka jinglong Khristan kaba shu kam ne kaba tang na sla.
Shuh shuh u la ong ba ki Kynhun Balang ha Ri Khasi Jaiñtia ki don bun ki lyngkha trei mishon sha kylleng ki jaka jong ka ri India, hynrei ka jingbamsap pat ha kane ka jylla ka la nang kiew. “Haba ngi kloi ban leit ïalap shabar, ha la ka jong ka ri ruh, ngi dei ban long kiba kloi ban ïeng ïaleh pyrshah ïa ka jingbamsap”, la ong u nongïalam ka VPP.
U la pynkynmaw ba ka sorkar MDA, kaba kynthup ïa ka NPP, UDP, PDF, BJP, HSPDP, ka la pyllut haduh palat 800 klur tyngka na ka bynta ka jingïaleh pyrshah ïa ka jingpang COVID 19 ha ka snem 2020 bad 2021. “Kat kane ka jingpyllut da lei lei ngin nym lah pdiang bad dei ban tohkit bniah, hynrei lada phi pdiang ïa kane ka jingpyllut te jied ïa ki Party ba don ha ka MDA”, la ong u Bah Ardent.
U Bah Shanlang Warjri, Kyrtong ka VPP na Mairang, ha ka jingkren jong u, u la ong ba ki don ki MLA mynta ki byn pat nang wat tang ban sam skhim ruh, namar ki ju kop ba ki la sam ïa ka skhim shispah percentm katba kiba bun pat ki nongthep vote kim ïoh satia bad kiba bun kiba ïoh kidei tang ki nongbud ne kiba dei na ka Party jong u MLA. “U MLA um mihkhmat tang ïa ka Party kaba pynjop ïa u, hynrei u mihkhmat ïa ki paidbah jong ka Constituency baroh kawei”, la ong u Bah Warjri.
Shuh shuh u la ong ba u nongmihkhmat udei ban kren bad ïasaid ïa ka jingeh ki paidbah baduk, ki nongñiah auto, ki nongshong ïew bad ki samla, ym dei ban wan leh Boss sha Constituency ryngkat ki Pulit pahara. “Ngi jied ïa ki Nongmihkhmat ban rah ïa ki jingeh bad ban long ka sur jong u paidbah’, la ong u kyrtong ka VPP.
U la ong ruh ba u mih ban ïakhun ïa kane ka elekshon 2023 na ka bynta ban pyrshang ban rat diengkhong ïa ka jingduk jingkyrduh. U la ong ka Meghalaya ka la dap 50 snem ka rta, hynrei kaba sngewsih ka long ba kadei ka jylla kaba dang don bun kiba duk ba kyrduh. “Kynmaw ko ki paidbah ba ka 500 ka 1000 tyngka ha ka elekshon kan nym lah ban rat diengkhong ïa ka jingduk”, la ong u Bah Shanlang.