Ha baroh 29 tylli ki constituency yn pynieng kyrtong ka NPP ha GHADC

Shillong, Nohprah 03 : Ka National People’s Party (NPP) ka la thmu ban pynbna noh shen ïa ki kyrtong MDC na bynta ka elekshon ban wan ha Garo Hills Autonomous District Council (GHADC), ong u Working President bad Myntri Sorkar ka jylla u Marcuise N Marak.
“Ngim pat dep jied lut ïa ki kyrtong haduh mynta watla ngi la dep ban pynkut ïa ka jingpdiang ïa ki aplikeshon na ki kyrtong kiba pan tiket na ka party. Shen ngin sa bishar bniah bad ngin sa don da ka jingïalang jong ka Election Committee jong ngi ban shim pat ïa ki sienjam kiban wan nangne shakhmat,” la ong u Marcuise haba kren bad ki lad pathai khubor ha ka sngi Thohdieng.
La ïathuh ruh ba ka NPP ka la ïoh pdiang bun tylli ki aplikeshon na ki constituency bapher bapher, ha kaba ki don ki constituency kiba don lai haduh hynriew ngut ki kyrtong kiba ïakhun ban ïoh tiket na kawei kawei ka constituency. “Ngin sa pynieng kyrtong na baroh 29 tylli ki constituency,” la pynthikna u Marcuise.
Une u Nongïalam ka NPP u la kyntait ruh ïa ka jingkam jong ka seng Congress ba ka la nang ïohbor ha ri lum Garo hadien ka jingwan pynïasoh biang u MLA barim ka Rangsakona u Zenith Sangma bad kiwei kiwei ki nongïalam.
“Ngi la dep ban pynrem ïa ka kurim jong u Zenith Sangma bad ngi la jop ïa ka bye-election ha Gambegre, kumta ngi sngewskhem ïa ka jingtreikam jong ngi,” la bynrap shuh shuh u Marcuise N Marak.