Nongpoh, Naitung 01: Ka long ka jingsarong ïa ka Kur Mariang bad ïa ka Ri Bhoi District bad kumjuh ruh ïa ka jylla hi baroh kawei, ha kaba kawei ka longkmie na Ri Bhoi District ba la tip kyrteng kum Kong Pinki Maring la lah ban wan rah ïa ka nam Beautiful Skin na ka lympung ïa khun bhabriew ba la tip kum ka Mrs. World International 2024, kaba la long ha ka 1 tarik u Jylliew, 2024, ha Leela Hotels and Resort Ambience Mall Gurgaon.
Kum ban shu pynkynmaw, ka Longkmie Pinki Maring ka dei ruh ka nongjop kaba nyngkong jong ka Miss Meghalaya ha u snem 1998 bad katkum ka khubor bala ioh lum, ka kong Pinki Maring ka dei ka longkmie kaba la rung haka thup ki 60 ngut ki finalist napdeng 500 ngut ki nongïashim bynta na kylleng ka pyrthei kiba la wan shim bynta ha kane ka lympung ba ka la wan rah nam na katei ka jingïakop thei bha briew.
Ka kur seng kur Maring ryngkat ki bahaïing hasem, ka kmie bad ki hymmen ki para, mynta ka sngi ki la leit ban pdiang burom ïa kane ka Longkmie, hadien ba ka la wan poi ha Kadlingsuiñ, Guwahati bad la leh burom ruh ïa ka da kaba ai syntiew kum ka jingburom ïa kane ka jingjop kane ka Longkmie na katei ka lympung ïakop thei bha briew ha ka kyrdan ki Longkmie.
La synran ruh ïa ka naduh na Kadlingsuiñ Guwahati, ha ka jingwan phai jongka sha laïing, tad haduh ba ka la poi ha Nongpoh, ba la leh burom bad pdiang burom ruh ïa ka ha Jiva Restaurant Nongpoh.
Haba ai jingkren ha kane ka sngi naduh ki rangbah kur Maring, u Bah Stephan Maring, na ka liang ka Longkmie ka Kong Marian Maring, ki la pynpaw ïa ka jingkmen ba kane ka Longkmie na ka kur Maring ka la wan rah nam bad burom ïa ka Kur bad ka burom ka long ym tang ïa ka kur Maring ne ïa ka ïing ka sem bad ka long ruh ka burom ïa ka Ri Bhoi District bad ka jylla hi baroh kawei.
Na ka liang ka kur Maring, ki la ai ruh ka jingkyrkhu kyrdoh ïa kane ka Longkmie ba kan dang kiew irat ha baroh ki liang bad ha kajuh ka por ruh ba kan trei shitom na ka bynta ban poi sha ka thong jong ka jingjop ha ka jingim jongka.
Haba kren ha kane sngi, na ka liang ka Longkmie Pinki Maring, ka la pynpaw ïa ka jingsngewnguh nyngkong eh ïa u Blei ba dei lyngba ka jingdon ryngkat jong u, ba ka la lah ban poi sha kane ka jingjop bad ha kajuh ka por ruh ka ai khublei kyrpang ïa kiba haïing hasem bad ruh ki kmie kpa, ki hymmen ki para bad ki paralok ki parajor, kiba la kyrshan ïa ka na ka bynta ban leit shim bunta ha katei ka jingïakop thei bha briew.
Shuh shuh, ka la ong ruh kum ki Longkmie haba pynpaw ïa kane ka jingjop bad ka nam ka burom ba ka la wan rah ha ba leit ban shim bynta ha kane ka rynsan ïa kop thei bha briew, ki don ruh ki nongkyrshan kiba na sha lyndet kita ki kynthup naduh ki kmie ki kpa, ki bahaiing hasem, ki paralok bad ryngkat ka jingminot nalade shimet, ka la bynrap.
