FRANCE, Risaw 11: U kapten jong ka France, u Kylian Mbappe, u la weng noh ïalade na ka jingïalehkai ïaknieh rung World Cup (qualifier), ka ban long ha ka sngi Nyngkong pyrshah ïa ka Iceland, namar ka jingmynsaw ka khongdong kjat kamon jong u, kaba la jia ha ka jingïalehkai ba ka France ka la pynliem ïa ka Azerbaijan da 3-0, la pynbna ka French Football Federation (FFF) ha ka sngi Saitjaiñ.
Une u rangïalehkai ba 26-snem, uba la mad ïa ka samoi kaba seisoh da kaba thep 14 kol ha ki 10 tylli ki jingïakhun na ka bynta ka Real Madrid, u la mynsaw ha ka minit kaba 83 jong ka jingïalehkai pyrshah ïa ka Azerbaijan tang hadien ba u la thep ïa kawei ka kol bad ïarap kawei ka assist.
“U coach ka ri (Didier Deschamps) u la pynthikna ïa ka jingweng noh jong u. U Kylian Mbappe u la kynriah noh bad ka klob jong u bad yn nym bujli ïa u,” la ong ka FFF ha ka kyrwoh.
Ka France, kaba lamkhmat ïa ka Group D da ka rekod jingjop kaba paka ryngkat ki 9 poiñ na ki lai tylli ki jingïalehkai, kan leit sha Reykjavik ban aireng pyrshah ïa ka Iceland, kaba wan ha ka kyrdan ba lai ha kane ka Group.
