FIFA World Cup 2026: Lah ban lait u Ronaldo na ka jingshah sospon ha ka jingïakhun ba nyngkong

Portugal, Naiwieng 26: U khlur ïalehkai phutbol jong ka Portugal, u Cristiano Ronaldo, u lah ban ïalehkai ha ki jingïalehkai ba nyngkong jong ka FIFA World Cup 2026, hadien ba ka synjuk phutbol ba hehduh ha ka pyrthei, ka FIFA, ka la ai ïa u ïa ka rai “sospon” ba tang shipor ha ka sngi Ba-ar, hadien ba u la ïoh ïa ka red card.
Une u rangïalehkai ba 40 snem ka rta u la shah beh noh ha ka por ba ka Portugal ka la shah rem da 2-0 kol ha Dublin ha kaba sdang jong u bnai Naiwieng hadien ba u la sangah da ka tymbuid ïa u Dara O’Shea na met, ban ïoh mad ïa ka jingshah beh kaba nyngkong jong u ha ki 226 tylli ki jingïalehkai bar ri na ka Portugal.
Ka FIFA, ka la khang ïa u Ronaldo na ka bynta lai tylli ki jingïakhun, ha kaba ar tylli na kine un sa duh ban mih madan, bad kawei la pyndep ha ka por ba ka Portugal ka la pynskhem ïa ka jingïoh rung jong ka, ha ka jingïakhun pyrshah ïa ka Armenia.
“Katkum ka kyndon kaba 27 jong ka FIFA Disciplinary Code, la pynsangeh noh ïa ka rai sospon jong ki ar tylli ki jingïalehkai kiba dang sah hapoh ka por kaba shisnem,” la ong ka FIFA ha ka kyrwoh.
“Lada u Cristiano Ronaldo u leh sa kawei pat ka jingpynkheiñ aiñ kaba kum kane ka jinglong ha ka por ba shah pynshitom, ka rai pynshitom kan treikam mardor ha ki ar tylli ki jingïalehkai kiba hadien (jong ka Portugal),” ka la bynrap.
U Ronaldo, u nongthep kol ba bun tam jong ki shynrang ha ka phutbol bar ri da kaba thep 143 tylli ki kol, u thmu ban ïalehkai ha ka World Cup kaba hynriew ha ka aïom lyiur ban wan ha America, Mexico bad Canada.
Utei u rangïalehkai barim jong ka Real Madrid bad Manchester United, uba don mynta ha Al Nassr ha Saudi Arabia, um pat shym la lah ban rah ïa kane ka trophy hynrei u la jop ïa ka Euro 2016 bad ka Portugal.
Ka jingpynïakap kynhun na ka bynta ka World Cup 2026 (group stage draw) kan long ha ka 05 tarik u Nohprah.