Shillong, Naiwieng 24 : Ka Portugal ka la khur jingjop ha ka jingïalehkai sdang ha ka FIFA World Cup 2022 ha Qatar da kaba pynliem da 3-2 kol ïa ka Ghana na ka jingïalehkai na ka Group H ha Stadium 874 hynne ka janmiet sngi Palei.
U Head Coach ka Portugal ha kane ka jingïalehkai sdang u la pynmih madan ïa u rangïalehkai thep kol kynsai jong ka kynhun u Christiano Ronaldo, Joao Felix, Andre Silva, Bruno Fernandez ha kaba ka kynhun ka la lah ban teh lakam bha ïa ka jingïalehkai.
Ka Portugal naduh ba sdang ka la ñion sha ka kut jong ka Ghana bad pynsmiej katto katne ki jingthep kol. Ka jingïalehkai hapdeng kine ki ar tylli ki team ka long kaba itynnad bad ïakhaid bha bad ha kaba kut jong ka kylla step baroh ar ki khlem ïoh ban thep kol. Hynrei dei ka Portugal kaba la ïoh ban plie pyrda nyngkong ha ka jingïalehkai jong ka kylla miet lyngba u khlur thep kol kynsai u Christiano Ronaldo.
U Ronaldo u la ïoh ban thep ïa ka shi kol lyngba ka penalty ha ka minit ïalehkai ba 65 hadien ba u la shah pynur jubor hapoh box bad haba shim hi ka jingbahkhlieh ïa ka jingshut penalty, khlem da pynlehnoh ei ka bol ka la rung suk shapoh jar.
Lyngba katei ka shi kol ka la nang ai mynsiem ïa ka kynhun bad ïakhun tyngeh beit triang. Ka Ghana ruh khlem da duh mynsiem ka la ñion sha ka kut jong ka Portugal bad da katei ka rukom ïalehkai ka la wan urlong ban ïoh thep ïa ka kol pynïakhaid lyngba u Andre Ayew ha ka minit ïalehkai ba 73.
Da katei ka jingïathep ba mar ar kol ka jingïalehkai ka la nang shongshit ha baroh arliang, hynrei dei ha ka minit ba 78 u Joao Felix u la ïoh ban thep ïa ka kol pyntam na bynta ka kynhun ïalehkai jong ka Portugal. Bad tang hadien ar minit ba la sdang biang ka jingïalehkai, u Rafael Leao (80min) uba mih madan ha ka kylla miet u la ïoh ban thep shi kol lyngba ka bol ba la buh bha da u Fernandez.
Ki rangïalehkai ka Ghana ki la ïakhun tyngeh ban pynphai ïa ki tei ki kol bad dei ha ka minit ba 89 u Osman Bukari u la ïoh ban thep ïa ka shi kol ha kaba u la pyrthuh bud k ajrukom lehkmen thep kol kum u Christiano Ronaldo.
Ka Portugal hashwa ban kut ka jingïalehkai ka la rit mynsiem hadien ba u rangap kol jong ka u la bakla ban buh ïa ka bol ba u la ïoh ban kem, ha kaba u rangïalehkai ka Ghana uba don shadien jong u, u la ïoh ban knieh, hynrei donbok ba u khlem ïoh ban thep kol na ka jingstet u rangap dien ka Portugal u Pareira uba la shut noh ïa ka bol shwa ba kan rung shapoh kol.
Kumta haduh kaba kut jong ka jingïalehkai ka Portugal ka la pynliem da 3-2 kol bad khur jingjop ha ka jingïakhun sdang ha kane ka World Cup ha Qatar.
