Erwin: Imat buhrieh eiei ka Sorkar lada ym pyllait paidbah ïa ka kaiphod u T. Vaiphei

Shillong, Naitung, 13: U Muktiar ba pawkhmat u Bah Erwin K. Sutnga ha ka sngi Balang u la dawa ïa ka Sorkar Meghalaya Democratic Alliance (MDA) ba ka dei ban pynbna paidbah noh mardor ïa ka kaiphod tohkit ba la khlieh da u nongbishar ba la shongthait u T.Vaiphei halor ka jingshah siat ïap jong u Bah Cheristerfield Thangkhiew ha ka jingleit khynra jong ki Pulit ka East Khasi Hills bad East Jaiñtia Hills District ïa ka iingsah jong u ha Mawlai Kynton Massar, Shillong.
“Nga lyngngoh ba ka Sorkar kam pyllait paidbah ïa ka kaiphod tohkkit (halor ka jingshah siatïap) bad nga tharai kin don ki jinglap eiei jong u Justice Vaiphei. Ki paidbah ki don ka hok ban tip,” u la ong.
“Kito kiba donkti, khamtam ki Pulit, ki dei ban shah pynshitom,” la bynrap u Bah Erwin.
“Mynta ka sngi, nga ruh nga dawa ba ïa ka kaiphod tohkit jong u Justice Vaiphei halor ka jingshah siat ïap jong u Bah Cheristerfield Thangkhiew dei ban pyllait paidbah,” la dawa u Bah Erwin.
“Lada kim pyllait paidbah ka don ka jingsuba ba buhrieh eiei na ka liang jong ka Sorkar bad na ka liang jong ka tnat Pulit,” ong shuh shuh u Bah Erwin.
Ka Sur ki Nong Mawlai ‘ kaba kynthup ïa ka KSU, FKJGP bad HNYF Mawlai Circle ka la phah da ka jingthoh sha baroh ki Seng Saiñhima kiba kynthup ïa ka NPP, UDP, PDF, HSPDP, NCP bad BJP kiba don ha ka kynhun Meghalaya Democratic Alliance (MDA) kaba bat ïa u lakam synshar bad sha ka All India Trinamool Congress (AITC) bad Congress kiba shong ha ka Liang Pyrshah bad sha ka Voice of the People Party (VPP) kaba dei ka Seng Saiñ Hima Sima bathymmai haka Jylla ban shim khia ha kaba ïadei bad ka jingshah pynïap klep jong u Bah Cheristerfield Thangkhiew bad ban dawa ïa ka Sorkar Jylla ba kan sei madan noh ïa ka kaei kaba mih na ka jing tohkit ba laitluid ïa kaba la khlieh da u Justice T. Vaiphei kaba u ladep ban aiti sha ka Sorkar naduh ka 19tarik, Jymmang, 2022.
“Hynrei ka long kaba sngewsih ba mynta lajan dap shi snem, kata, hadien ba ladep ban ai ïa ka kaiphod, hynrei na ka liang jong ka Sorkar kam shym la lah ban sei madan ïa ki jingshisha. Kane ka paw ba ka Sorkar ka la pyrshang ban buhrieh ïa ki katto katne ki heh Pulit bad ïa ki katto katne ki heh Sorkar kiba donkti ban ïasylla lang ban pynïap klep ïa u Bah Cheristerfield Thangkiew. Kane ka pyni shai ba bor bahalor bad ka tnat Pulit ki la leh ïa kaba bakla. Na ka liang jong ngi kum ka kynhun ngim lah ban pdiang ïa kiba kum kine ki kam lehnoh ba la bei pisa hi da ka Sorkar ban pynïap klep ïano re ïano khamtam kaba wanrah ïa ka jingduh noh ïa ka mynsiem ba kordor jong u nongïalam barim bad bahakhmat jong ka kynhun kieng atiar HNLC,” ong ka Sur ki Nong Mawlai.