Shillong, Rymphang 26 : Ka United Democratic Party (UDP) ka la rai ba hadien ba la kut ka Dorbar Mangtyngka kin sa shong ïa ka jingialang ban shim ïa ka rai haba ïadei bad ka elekshon MDC ha Garo Hills Autonomous District Council kaban long ha ka 10tarik Iaiong bad kumjuh bad ka elekshon shiteng samoi ha Shillong Parliamentary Constituency na ka daw ka jingkhlad noh u Dr. Ricky AJ Syngkon.
Haba kren bad ki lad pathai khubor ha ka sngi Palei, na ka liang u President ka UDP u Bah Metbah Lyngdoh u la ong, “Kumba ka long mynta ngim pat ïakren ha ka party, kumta ka party ka hap ban shong shwa. Hadien ba la kut ka Dorbar, thikna ba ngin sa ïa kren ïa ka lynti ban ïaid shakhmat kum ka party halor kane ka elekshon shiteng samoi.”
Haba ïadei pat bad ka elekshon MDC u la ong ba ïa mynta ba ki dang bunkam ha ka Dorbar Mangtyngka kumta la kumno kumno ha ka taiew ba nyngkong lane shwa ka 10tarik kin sa lah ban shim rai. “Ngin kynduh lang ha shwa ba ngin shim ïa ka rai.”
Katkum ka jingong jong u, ki nongïalam ka UDP na rilum Garo kin sa kynduh lang shwa na ka bynta ban ïa kren sani bha halor kane ka elekshon MDC ha GHADC mynta ka samoi bad ïa kane ruh kin sa ïa kren hadien ba la kut ka Dorbar Mangtyngka u la ong.
