Shillong, Lber, 29: Ka Khun Hynñiewtrep National Awakening Movement (KHNAM) ka la rai ban ai jingkyrshan ia ki kyrtong jong kiwei ki seng saiñpyrthei ha ka Elekshon Lok Sabha ka ban sa long ha ka 19 tarik, Ïaiong watla ka party kam shym la lah ban pynïeng kyrtong ha kane ka kynti.
U Working President ka KHNAM Bah Thomas Passah haba ïakren bad u nongthoh khubor u la ong ka daw ba ka party kam shym pynïeng ïa la u jong u kyrtong ka long namarba ka KHNAM ka kwah ban pynleit jingmut ha ka Elekshon MDC ha Khasi Hills Autonomous District Council (KHADC).
“Kam don jingmut bad ngi la don ka jingïakren ban pyrkhat tang na ka bynta ka elekshon MDC,” la ïathuh u Bah Passah.
Haba kylli, “ngin sa pynlong shwa da ka jingïalang ha kine ki taïew ban sa wan na ka bynta ban shim rai ïano ka party kan ai jingkyrshan bad kum ka seng ngin hap hap ban peit shwa kiei ki mat treikam jong ki seng saiñpyrthei ne jong ki kyrtong ha kaba ïadei bad ki mat kiba ïatyngkhuh bad ka jylla khamtam kiba ïadei bad ki ritpaid riewlum.”
“Ngi ladep ban pynlong shisien ïa ka jingïalang halor kane hynrei ngim pat rai pat shim rai ïano ngin ai jingkyrshan hynrei ha kane ka taïew ban sa wan, ngin sa pynlong jingïalang bad ngin sa shim ïa ka rai,” la ïathuh u Bah Passah.
U la pynpaw ruh ba ka KHNAM ka kwah da ka Sorkar ka bym dei kaba synshar da ka Bharatiya Janata Party(BJP) hapoh ka Sorkar Pdeng namarba lada ka BJP kan dang ïai wan ha ka bor synshar, kan sa pyntreikam ïa ka Citizenship Registration Certificate Register, nangta sa ka National Population Register (NPR), sa ka National Register of Citizens (NRC) bad kine kin buh jingeh ïa ki ritpaid hapoh ka Ri India, u la bynrap.
“Na ka bynta ka jingshngaiñ jong ngi, ngi hap ban pyntikna ba ngin ïaid da ka Sorkar ka bym don ka BJP,” u la ong shuh shuh.
U la ïathuh ruh ba ki don ki seng saiñpyrthei kiba la phah shithi ban pan jingkyrshan hynrei ka party kam pat shim satia ïa kano kano ka rai. “Ngi hap ban pyrkhat bha nadong shadong hashwa ba ngin shim ïa ka rai,” u la ong.
