Elekshon 2028 : Nga la dei u MLA jong ka NPP ka shong ha ka party ban rai : Bah Ronnie

Shillong, Naitung 30 : U MLA ba dang pynïasoh thymmai sha ka National People’s Party (NPP) Bah Ronnie V Lyngdoh ha ka sngi Balang u la ïathuh ba kam don satia kano kano ka jingïapynbeit ne ka jingïa kren na ka bynta ka elekshon 2028 bad u Bah Hamlet Dohling uba dei u MLA barim ka Mylliem bad ha kajuh ka por u Working President jong ka NPP.
Haba kren bad ki lad pathai khubor hadien ba u la dep ban pynïasoh sha ka party, une u MLA na Mylliem consitituency u la ong, “Nga la dei u MLA jong ka NPP bad kumta kane baroh ka shong ha ka rai jong ka party ban rai.” Ha kajuh ka por u ong ruh ba ka elekshon ka dang jngai kumta ka dang kloi than ban ia kren ïa ka elekshon naduh mynta.
“Kaba hakhmat bad kaba kham kongsan mynta na bynta jongnga ka long ban trei na bynta ka bit ka biang bad ka bha ka miat jongka constituency,” u la bynrap biang.
Katba na ka liang u Nongïalam ka NPP, Bah Sniawbhalang Dhar ba dei ruh u Symbud Myntri Rangbah ka jylla haba jubab halor ka jingkylli ba ïano ka party kan ai tiket ha ka elekshon 2028 khamtam haba u Bah Hamlet ruh u dei u nongïalam ba radbah ka party ha ka jylla, ka jubab kaba u ai ka long, “Ïa kata ym pat dei ka por ban ïa kren namar ka elekshon ka dang sah sa lai snem kumta ngin sa peit namar ka party jongngi kadei ka party kaba kohnguh ryntih ïa kaba la pynbeit.”
Ha kajuh ka por u Bah Sniawbhalang u la ai ka jingïaroh ruh ïa u Bah Hamlet bad ka kynhun kiba la trei shitom halor kane ka bynta.
Shwa kane haba ïa kren bad u Working President jong ka NPP, Bah Hamlet Dohling ula ïathuh ba ka jingïakren bad u Bah Ronnie kadei kaba la slem bha bad khatduh kane ka kam ka la urlong ha kaba u la wan ban pynïasoh pura sha ka party.
U Bah Hamlet u la ong ruh ba u sngewkmen ba naduh ki paidbah haduh ki nongïalam ki la phaikhmat mynta sha ka NPP haba ki ïohi ïa ka rukom treikam bad ki kam pynroi kiba ka sorkar jylla hapoh ka jingïalam jong ka NPP ka pynpoi sha ki paidbah.
“Ym dei eh tang ha Mylliem ba ka party ka trei bad ïoh ruh ban khring ïa ki nongïalam hynrei ngi trei borbah ha baroh kawei ka jylla na ka bynta ban pynkhlain shuh shuh ïa ka party na bynta ka elekshon ha u 2028,” u la ong.
Katkum ka jingong jong u, ka jingwan pynïasoh jong u Bah Ronnie ruh ka la ai mynsiem bad ai bor shuh shuh ïa ki nongïalam ka party ban trei borbah shuh shuh ha ka jylla hi baroh kawei.