Ka lyer elekshon sha ka Ingdorbar Thawaiñ ka Jylla ha u snem 2023 ka la beh sngewtynnat hir hir ha kaba ki nongïalam jong ki Seng Saiñpyrthei bapher bapher ka Jylla ki la ïabunkam ban leit pynskhem nongkitkam, thaw Unit, thaw Circle bad leit khroh leit kjor ïa ki padibah da ki thong treikam ba ki Party ki ieng ban trei na ka bynta ka bha ka miat jong ki paidbah nongshong shnong ha ka jylla ynda la ïoh thaw Sorkar hadien ka elekshon.
Nalorkata, ki la mih ruh sa ki kynhun ban sdang pynlong ïa ki rynsan ïalap elekshon ha kylleng ki bynta bapher bapher jong ki District ha ka jylla da kaba khroh ïa ki paidbah ban wan jingïalang hana ban ïa jied ïa uta u kyrtong sha ka elekshon 2023.
Katkum ba la sakhi ha kylleng ki Constituency bapher bapher, ka jingïaphet na kawei ka seng sha kawei ka seng, ka jingïaphet na kawei ka party sha kawei ka party ka jur bha haba la wan tied jingkhang ka lyer elekshon. Hangne la sngewthuh shai ïa ka jingïasdang khohreh politik ki paidbah kiba ju shongshit shisien san snem haba la poi ka samoi jied syiem (Nongmihkhmat sha ka Ingdorbar Thawaiñ).
Haba phai sha kane ka elekshon ba mynta lehse kan long kaba kham pher haba ïanujor bad ki snem kiba la leit noh, namar ka dei ka juk jong ka jingkylla bad ki paidbah ruh ki la kham stad bad kham shemphang namar la palat sanphew tylli ki snem ki la ïaid ka jylla kam pat i don than kata ka jingkylla.
Kiba ryngkang na ka party A sha ka party B, ki pynpaw ba ki kwah ban ïohi ïa ka jingkylla bad ki la kwah noh da ka dur u Nongmihkhmat bathymmai uba don bun ki jingkular bad uba la leh bha leh sbun haduh katta katta ïa ki nongkyrshan baieid naduh ka sngi ba u la pynbna ban aireng kum u kyrtong ha ka elekshon.
Ka jingïaphet seng bad ryngkang diengkper kan sa jia shen ruh wat ha ki MLA kumba la paw na ki khubor hamsaïa. Lehse ïa ka jingkylla ka saiñ hima sima hapoh ka jylla kan sa paw pyrthei ynda la kut ka Dorbar Synrai jong ka Iingdorbar Thawaiñ ka Jylla mynta u snem.
Haba phai sha ka BJP, ha kane ka kynti kan jwat bha namar ka jingïakynad hapdeng u BahAL Hek bad u Bah Sanbor Shullai ki arngut ki MLA hapoh ka Party bad la sngewthuh ba u Bah Alexander L. Hek naduh ba u la shah pynduh ïa ka shuki Minister um da kham sngewmon shuh ban don hapoh ka Party bad la bna wur wur wer wer ba un leit ïasnoh bad ka All India Trinamool Congress.
Ka NPP hapoh ka jingïalam u Conrad K. Sangma kum u National President ka Party ka sdang suhthied bha wat ha rilum Khasi bad Jaiñtia. Tang ha kine ki khyndiat bnai la ïohi ba ka jingpynïasoh jong ki MDC sha kane ka party kaba bat ïa u lakam synshar hapoh ka jylla ka la thnem bha.
Ban phai sha ka Congress ki la duh jingkyrmen namar ka jinghiar arsut jong kane ka Party bad mynta lei lei kane ka party kam shym don shuh wat tang uwei u MLA hapoh ka Ingdorbar Thawain ka Jylla hadien ba 12ngut ki la phet sha ka Trinamool Congress bad 5 ngut kiwei pat ki la shah beh seng shipor hadien ba ki la ai jingkyrshan ïa ka Sorkar MDA hapoh ka jingïalam jong ka NPP ba la kyrshan da ka BJP.
Wat ïa ka Peoples Democratic Front (PDF) la ima ha u snem 2023 wat lada u President jong kane ka party u Bah Banteidor Lyngdoh Mawphlang u la tap eitmiaw ba kam don kano kano ka jingïathud hapoh ka party bad ba ki lai ngut ki MLA kin dang ïakhun na ka tiket jong ka PDF ha u snem 2023.
Katba nang mih ki sngi, ka jingïakop ban pyni ïa ka jingbunpaid ka la nang itynnat shuh shuh namar u kyrtong uba kham bunpaid u kham don jingkyrmen. Hynrei ki don ki khep ba wat u kyrtong u bym ju kop ban pyni ïa ka jingbunpaid pynban u jop ei khamakha na ki nongthep vote ba jar jar (silent voters) kiba bishar bad thew ïa u dieng kot thik pa thik uno u kyrtong uba kham shemphang bad uba don ïa ka maiñ ban long u Nongmihkhmat bad uno pat uba kham stad tang ban pynbiej paidbah da kaba plie lai siew saw sien ïa ujuh u mawnongrim bad uba lapmiet tang ban shu put ronsing ïa ki kam sam work order bad sam syntex, sam shatri, sam kymbor, sam pliang, sam khiew bad kiwei kiwei ki kam khutia mutia tang ban ïoh pynpaw pyrthei ba u dei u kyrtong uba smat uba sting kum u thyllah.
