EKHDCA 5th T20 Cricket League 2026: Khur jingjop ka SS Mawlong Mawriang bad ka Cricket Lovers

SAITSOHPEN, Lber 02: Ka Seng Samla Mawlong Mawriang bad ka Cricket Lovers ki la jop ïa la ki jong ki jingïalehkai ha ka lympung 5th District League T20 Cricket Tournament 2026 jong ka East Khasi Hills Cricket Association, kiba la long hynne ka sngi Nyngkong (02 tarik Lber).
Baroh ar ki la jop hadien ba ki la sdang tied nyngkong, ha kaba ka Seng Samla Mawlong Mawriang ka la pynliem noh da 60 ron ïa ka Saitsohpen Veteran Legend; nangta ka Cricket Lovers ka la jop da 130 ron pyrshah ïa ka Pomshutia Cricket Club.
Haba tied nyngkong hadien ba jop ïa ka jingkynting pisa (toss) ka SengSamla Mawriang ka la kamai 221/2 haki 20 ober, ha kaba u Kitdor H Majaw u la duna tang 5 ban kynjoh ïa ka spah ron, da kaba noh synñiang 95 ron naki 59 tylli ki bol. U Shngain Kynta u la khur 1/28 naki 4 ober.
Ha ka jingpyrshang ban beh ïa ka thong, ka Saitsohpen Veteran Legend ka la tied duna tang 161/8 haki 20 ober. U Clement Khongsngi u la lamkhmat ha ka tied da 46 ron naki 22 bol, katba u Rahul Bhimsubro u la khur 2/26 haki 4 ober.
Na ka bynta ka jingnoh synñiang kaba khraw ha ka tied, u Kitdor Hilary Majaw u la shah jied ban khur ïa ka khusnam Player of the Match.
Ha ka jingïalehkai kaba bud ka Cricket Lovers ka la lah ban tied 202 ron bad hap 5 wiket haki 20 ober, ha kaba u Heiyoomiki Ryngkhlem u la lamkhmat da kaba kamai 64 ron naki 30 bol. U Shembhalang Pyngrope jong ka Pomshutia u la khur 2/38 naki 4 ober.
Haba jubab, ka Pomshutia ka la shah pynkhyllem noh baroh 10 wiket tang na ka bynta 72 ron haki 13.4 ober, bad dei tang u Pynbianglang Pyngrope (22 ron naki 28 bol) uba la seisoh ha ka tied.
Na ka liang jong u Mewankitbok Kharpuri, rangkawang bol jong ka Cricket Lvers, u la pyndep ïa ka pali boling da kaba khur 3/20 naki 4 ober, hynrei ïa ka nam Player of the Match la khur da u Heiyoomiki Ryngkhlem.