SAITSOHPEN, Rymphang 24: Ka Rangshken Area Cricket Club bad ka Cricket Smit ki la jop ïa la ki jong ki jingïalehkai ha ka lympung ‘5th District League T20 Cricket Tournament 2026’ jong ka East Khasi Hills Cricket Association (EKHDCA), ba la long hynne ka sngi Ba-ar ha Saitsohpen, Sohra.
Ka sngi ba san (Day-5) jong kane ka lympung ka la sakhi ïa ka Rangshken Area CC kaba la jop da 7 wiket ïa ka Marbisu CC, bud sa ka jingjop jong ka Cricket Smit da 73 ron pyrshah ïa ka Sportopia SCC.
Ha ka jingïalehkai ba nyngkong, ka Rangshken ka la pynkhyllem noh ïa baroh 10 wiket jong ka Marbisu CC tang na ka bynta 176 ron haki 20 ober, ha kaba u Rohan Rai u la kamai 42 ron naki 24 bol, katba u Kyrmenskhem Nongrum u la khur 2/22 haki 4 ober.
Nangta ka Rangshken ACC ka la pyndep ïa ka kamram ban kamai 177 ron da kaba hap tang 3 wiket haki 18.4 ober. La lamkhmat ïa ka tied da u Arjune Nongdhar (74 ron naki 54 bol) bad khur ruh ïa ka khusnam Player of the Match.
Ha ka jingïalehkai kaba bud, ka Cricket Smit ka la buh ïa ka thong kaba 147/10 haki 19.4 ober, bad u Bashaikupar Nongdhar u la ïohlad ban kamai 56 ron naki 33 bol, katba u Gedilbert Swer u la khur 3/9 naki 3 ober.
Ha ka jingpyrshang beh ïa ka thong, ka Sportopia SCC ka la khyllem noh baroh ki nongtied tang na ka bynta 74 ron haki 17.2 ober, bad dei tang u Bansiewkylliang Lapasam (16 ron naki 14 bol) uba la kham pawkhmat ha ka tied.
U Elbrenroy Mawthoh u la pynkut ïa ka jingïalehkai ryngkat ka jingkheiñ kaba paka, hadien ba u la khur 4/14 haki 3 ober bad ruh ïa ka khusnam Player of the Match.
