EKHCA Inter Office T20 Cricket 2025: Khur jingjop ka SSA Shella Bhologanj bad ka PHE Sohra Division

SOHRA, Lber 24: Ka SSA Shella Bhologanj bad ka PHE Sohra Division, baroh ar ki la jop ïa la ki jong ki jingïalehkai ha ka lympung ‘Inter Office Cum Corporate League T20 Cricket Tournament 2025’, ba la pynïaid da ka East Khasi Hills Cricket Association [EKHCA], ha Sohra, kiba la long hynne ka sngi Nyngkong.
Ka SSA Shella bhologanj ka la pynliem suk da 8 wiket ïa ka Sohra Post Office ha ka jingïalehkai ba nyngkong, hadien nangta ka PHE Sohra Division ka la jop da 20 ron ïa ka Telecom Combine ha ka jingïalehkai kaba bud.
Haba phai sha kaba nyngkong, ka Sohra Post Office ka la tied nyngkong hadien ba jop ïa ka jingkynting pisa (toss), hynrei ka la shah khanglad noh tang na bynta 81/8 haki 20 ober. Na ka liang jong u Daryll Donald Nongbri u la kamai 34 ron naki 33 bol, katba u Daminot (rangkawang bol jong ka SSA Shella bhologanj) u la khur 2/11 naki 2 ober.
Ka shimpor tang 6 ober ïa ka SSA Shella Bhologanj ban jubab ïa ka thong, ha kaba ka la lah ban tied pyndep ïa ka 82 ba ka donkam da kaba hap tang 2 ngut ki nongtied, kaba la pynthikna ïa ka jingjop da 8 wiket. U Mebanrikupar Malngiang u la long uba kongsan ha ka tied da kaba kamai 33 ron naki 13 bol bad u la khur syndon ïa ka nam ‘Player of The Match.
Ha ka jingïalehkai kaba bud, hadien ba jop ïa ka toss ka PHE Sohra Division ka la shimti hi ban tied nyngkong bad lah ban kamai 127 ron shuwa ban khyllem baroh 10 wiket haki 19.3 ober. U Marken B Kharkongor u la long uba kongsan ha ka tied da kaba kamai 32 ron naki 29 bol. U Aldrinson Nongsiej u la khur 4/19 naki 2.3 ober.
Haba pyrshang jubab, ka Telecom Combine ka la shah pynkhyllem baroh 10 wiket da tang 107 ron haki 16.3 ober, watla na ka liang jong u Teibansuk Sohkhlet u la trei shitom ban kamai 26 ron naki 19 bol hynrei ka kynhun ka dang sahdien sa 20 ron ban poi sha ka thong. U Larikupar Nongkynrih u la khur 3/1 haki 3 ober bad u la ïoh ruh ïa ka nam Player of The Match.