Saitsohpen, ïaïong 03: Ka Friends United bad ka Cricket Smit kin ïaknieh ïa ka nam lahduh jong ka lympung 5th District League T20 Cricket Tournament 2026 ba la pynïaid da ka East Khasi Hills Cricket Association, hadien ba baroh ar ki la jop ïa la ki jong ki jingïakhun semifinal kiba la long ha ka sngi Palei (02 tarik ïaïong), ha madan Saitsohpen, Sohra.
Ka Friends United ka la pynthikna ïa la ka jong ka jaka da kaba jop da 12 ron pyrshah ïa ka Sohra Combine, katba ka Cricket Smit ka la pynliem noh da 10 ron ïa ka Mawphlang CC.
Baroh ar tylli ki semi final la thmu ban pyndep ha ka sngi Balang hynrei namar ka jinglong jingman ka suiñbneng kaba artatien la hap ban pynkynriah noh ïa ka jingïalehkai sha ka sngi ba bud, ha kaba baroh ar la pynïalehkai tang 12 ober.
Ha ka jingïakhun ba nyngkong, ka Friends United ka la kam trai ban tied nyngkong hadien ba jop ïa ka jingkynting pisa (toss) bad kamai 114 ron da kaba hap 4 wiket haki 12 ober. La lamkhmat ïa ka tied da u E Nathan A Diengdoh, uba la noh synñiang 42 ron naki 30 tylli ki bol, katba u Darius Rani u la khur 3/26 naki 3 ober.
Haba pyrshang jubab, ka Sohra Combine ka la shah pynkhyllem noh baroh ki nongtied tang na ka bynta 102 ron haduh kaba kut ki 12 ober. Dei tang u Jona L Nonglait uba la kham pawkhmat ha ka tied, da 30 ron naki 22 bol.
U Nangkiewkor Moore Don u la khur 3/11 haki 3 ober bad shah jied ruh ban khur ïa ka khusnam Player of the Match, hadien ba u la noh synñiang ruh 30 ron ha ka por tied na ka bynta ka Friends United.
Hadien kane ha ka semi final kaba ar, ka Mawphlang CC ka la jop ïa ka jingïakynting pisa (toss) bad ka la aiti sha ka Cricket Smit ban sdang tied, kaba la kamai 93/8 ha ki 12 ober. U Pynkhrawbok Thabah u la lah ban kamai bun ron tam da 34 ron na ki 19 tylli ki bol, katba, ha kawei pat ka liang, u Bankit u la khur 2/19 ha ki 2 ober.
Watla kam da dei than ka thong kaba heh hynrei ka Mawphlang kam shym la lah satia ban pyndep ïa ka kamram, da kaba pynkut ïa ki 12 ober tang na ka bynta 83 ron bad hap 6 wiket. U Kyrshanlang Lyngdoh u la tied 33 ron naki 31 bol, katba u Pynkhrawbok u la ïoh ban khur 2/14 haki 3 ober bad pynkut ruh ryngkat ka khusnam Player of the Match.
Kumta ka jingïakhun phainal hapdeng ka Cricket Smit bad ka Friends United Sohra la buh ban long ha kane ka sngi Saitjaiñ, ka 04 tarik ïaïong, 2026 ha ka por 10 baje mynstep.
