EKHCA 5th District League T20 Cricket: Khur jingjop ka Nayabasti Youth Club bad ka Pomshutia CC
SAITSOHPEN, Rymphang 20: Ka Nayabasti Youth Club bad ka Pomshutia Cricket Club ki la jop ïa la ki jong ki jingïalehkai jong ka lympung 5th District League T20 Cricket Tournament 2026 ba la pynïaid da ka East Khasi Hills Cricket Association (EKHCA), kiba la long hynne ka sngi Thohdieng ha madan Saitsohpen, Sohra.
Baroh ar kynhun ki la jop haba wan ban tied nadien, ha kaba ka Nayabasti Youth Club ka la jop da tang 1 wiket pyrshah ïa ka Friends United, katba ka Pomshutia CC ka la jop da 8 wiket pyrshah ïa ka Royal Challenge Mawsynram.
Ka jingïalehkai ba nyngkong la ïohi ïa ka Friends United kaba la rai ban tied hadien ba jop ïa ka jingkynting pisa (toss), bad pyndep ïa ki 20 ober ban kamai 121 ron bad hap noh 5 wiket. U Nangkiewkor Moore Don u la kamai 30 ron naki 29 bol, katba u Sajib Debnath, jong ka Nayabasti Youth Club, u la khur 2/11 haki 4 ober.
Nangta ka Nayabasti Youth Club ka la pyndep ïa ka kamram ban kamai 123 ron haki 18 ober bad khyllem noh 9 wiket ban khur ïa ka jingjop. U Swapon Chakraborty u la lamkhmat ha ka tied da kaba kamai 21 ron naki 22 bol.
Na ka liang jong u Byran Mac Millan Marbaniang u la khur 3/19 haki 4 ober, hynrei ka jingtrei shitom jong u ka la long lehnohei namar ba ka Friends United ka la mad ïa ka namrem da tang 1 wiket.
Ha kaba kut, u Swapon Chakraborty jong ka Nayabasti Youth Club u la shah jied ban khur ïa ka khusnam Player of the Match.
Ha ka jingïalehkai kaba bud, ka Pomshutia ka la pynkhyllem noh ïa baroh 10 wiket jong ka Royal Challenger Mawsynraw tang na ka bynta 99 ron haki 15 ober, u Riche Hess Shangpliang u la ïohlad ban kamai 16 ron naki 12 bol, katba u Skhemborlang Khongbtep u la khur 3/13 naki 3 ober.
Haba jubab, u Shembhalang Pyngrope u la kamai 38 ron naki 32 bol, kaba la ïarap ïa ka Pomshutia CC ban kynjoh 100 ron haki 12.3 ober bad duh tang 2 wiket ban khur ïa ka jingjop bad ruh ban khur ïalade ïa ka khusnam Player of the Match.
Ha kane ka sngi na ka liang jong ka East Khasi Hills Cricket Association ka la pynlong ïa ka jingsngap jar kaba shi minit kum ka dak ka jingsngewlem halor ka jingkhlad noh u MP ka Shillong Parliamentary Seat, u Dr Ricky J. Syngkon. Ka EKHCA ka la rai ruh ban pynsangeh ïa ki jingïalehkai kiba dei ban long ha kane ka sngi Saitjaiñ (21 tarik Rymphang).