Shillong, Feb 19: Ka Royal Rangers bad ka Laitkynsew CC ki la jop ïa la ki jong ki jong ki jingïakhun ha ka lympung ‘4th District League T20 Cricket Tournament 2024’, ba la pynïaid da ka East Khasi Hills Cricket Association [EKHCA], ha Sohra hynne ka sngi Balang.
Ha ka jingïalehkai kaba nyngkong, ka Royal Rangers ka la jop suk ïa ka Mawryngkneng da hynñiew wiket shuwa ba ka Laitkynsew kan pynliem ïa ka Thynroid CC da 75 ron. Kine ki dei ki ar tylli ki jingïalehkai ba khatduh ha ka round robin ha kaba kane ka lympung kan jam sha ka wat ïakhun Quarterfinal ban sdang ha ka sngi Saitjaiñ.
Ka jingïakhun ba nyngkong, ka Royal Rangers ka la jop ïa ka toss bad jied ban bol nyngkong, ha kaba ka la lah ban pynkhyllem noh baroh 10 wiket jong ka Mawryngkneng na bynta 101 ron naki 14.4 ober. U Ruston Lamare uba kamai 19 ron naki 9 bol u la long uba kongsan ha ka tied, katba u Balabianglang Buhphang u la khur 4/31 naki 4 ober.
Hadien kane, ka Royal Rangers ka la lah ban kynjoh ïa ka thong (102 ron) tang ha ka 14 ober da kaba hap tang 3 wiket. U Lamphang Khongsni u la long uba seisoh tam ha ka tied da kaba kamai 23 ron naki 25 bol, katba u Moonlight War u la khur 2/24 naki 4 ober. ïa ka nam Player of the Match la khur da u Balabianglang.
Ka jingïalehkai kaba bud, la sakhi ïa ka Laitkynsew kaba la shimti ban tied nyngkong hadien ba jop ïa ka toss, bad ka la lah ban tied 170 ron haduh kaba kut jong ka 20 ober bad khyllem 5 wiket. u Mebanrikupar Malngiang u la long uba kongsan tam ha ka tied da kaba kamai 59 ron naki 45 bol, katba u Banrilang Kharbamon u la khur 2/27 naki 4 ober.
Haba jubab, ka Thynroid ka la shah pynkhyllem noh baroh 10 wiket tang na bynta 95 ron naki 18.1 ober. U Bankit Nongtraw (25 ron naki 19 bol) u la long uba kamai bun ron tam na bynta ka Thynroid. U Mebanrikupar uba la khur 3/11 u la ïoh syndon ïa ka nam Player of the Match.
Hadien ba ladep baroh ki jingïalehkai ha ka round robin, kane ka lympung kan jam mynta sha ka wat ïakhun Quarterfinal ka ban sdang naduh ka sngi Saitjaiñ. Ka QF ba nyngkong kan long hapdeng ka Cricket Lovers pyrshah ïa ka Cricket Smit nangta bud sa ka jingïakhun hapdeng ka Sohra Combines bad ka Laitkynsew.
Ki ar tylli ki Quarter final kiba bud kin long ha ka 25 tarik Rymphang, ha kaba ka Pomshutia CC kan aireng pyrshah ïa ka Laitjem CC ha ka por 9 baje mynstep bud sa ka jingïakhun hapdeng ka Friends United pyrshah ïa ka Mawsynram Hurdles CC ha ka por 12 shiteng mynsngi.
