Sohra, Rymphang 12: Ka Marbisu CC bad ka Saitsohpen ki la jop ïala ki jong ki jingïalehkai haka lympung 4th District League T20 Cricket Tournament 2024 bala pynïaid da ka East Khasi Hills Cricket Association ba la long hynne ka sngi Balang. Ka Marbisu CC ka la pynliem da 8 wiket ïa ka Royal Rangers ha ka jingïalehkai kaba nyngkong, katba ka Saitsohpen kala jop kput haduh 130 ron ïa ka Thynroid.
Ha ka jingïalehkai kaba nyngkong ka Royal Rangers ka la shimti ban tied nyngkong hynrei kaba sngewsih ka long ba baroh 10 wiket ki la shah pynkhyllem noh tang na bynta 36 ron naki 11.1 ober.
U Antoniyus Majaw u la kamai 6 ron naki 10 bol, hynrei ka namtam ka long sha u Richard C. Diengdoh uba la tyngshaiñ bha ha ka bol da kaba khur 3/8 naki 3 ober.
Haba jubab ka Marbisu CC ka la pyndep ban tied 37 ron tang ha ka 4.3 ober bad hap tang 2 wiket. Na ka liang jong u Lalaplad Tariang u la khur 1/11 naka 1 ober.
Ha ka tied u Ramesh Rai u la long uba kamai bun ron tam, kata da 13 ron naki 7 bol ha kaba ka Marbisu ka la pynthikna ïa ka jingjop da 8 wiket. ïa ka Player of The Match la khur da u Richard C Diengdoh.
Ha ka jingïalehkai kaba bud, ka Thynroid CC ka la aiti ïa ka Saitsohpen ba kan tied nyngkong kaba la lah ban kamai 204 ron haduh kaba kut jong ka 20 ober ba la mang bad hap 4 wiket. U Mebankyrshan Allya u la long uba seisoh tam ha ka tied da kaba khyrwit tam ïa ka spah ron (101 ron naki 58 bol), U Aleric Wanswet u la khur 1/27 naki 4 ober ha ka bowling.
Haba pyrshang beh ïa ka thong, ka Thynroid ka la shah pynkut noh da tang 74 ron naba khyllem baroh 10 wiket naki 19.4 ober, u Aleric Wanswet u la kamai 23 ron naki 29 bol. Haba phai sha ki rangkawang bol u Banraplang Pyngrope u la khur 3/4 naki 4 ober ha kaba ka Saitsohpen ka la jop suk haduh 130 ron. ïa ka nam Player of the Match la khur da u Mebankyrshan Allya.
