EKHCA 4th District League T20: Jop ka Laitjem & Cricket Lovers, palat spah ron kamai u Shavian 

Sohra, Rymphang 17: Ka Laitjem CC bad ka Cricket Lovers ki la jop ïala ki jong ki jingïakhun ha ka 4th District League T20 Cricket Tournament 2024 kaba la jam mynta sha ka sngi ba khatsaw (Day 14) ba la pynïaid da ka East Khasi Hills Cricket Association [EKHCA] ha ka 17 tarik Rymphang (sngi Nyngkong) ha Sohra.

Ka Laitjem CC ka la pynliem ïa ka Sportopia da 6 wiket ha ka jingïalehkai kaba nyngkong, nangta ka Cricket Lovers ka la jop kput haduh 146 ron ban pynliem ïa ka Thynroit CC, ha ka jingïalehkai kaba ar la sakhi ruh ïa ka jingtbit jong u Shavian Blah, uba la khyrwit palat ïa ka spah ron marwei ban pynjop ïa ka Cricket Lovers.

Ka jingïalehkai kaba nyngkong ka la sdang ha kaba ka Laitjem ka la aiti sha ka Sportopia ba kan tied nyngkong, bad kane ka kynhun ka la lah ban kamai tang 99 ron haduh kaba kut jong ka 20 ober bala mang, bad khyllem 9 wiket. Na ka liang jong u Macmillan Wahlang u la kamai 27 ron naki 40 bol. U Manchester Pathaw (rangkawang bol ka Laitjem) u la khur 4/15 naki 4 ober.

Ka Laitjem CC ka la pyndep ïa ka kamram da kaba pynsah sa 8.5 ober, da kaba kynjoh ïa ka 100 ron ba ka donkam tang ha ka 11.5 ober bad khyllem 4 wiket. Watla katta ruh, na ka liang jong u Vickyson Lambert War u la khur 2/19 naki 2 ober.

U Anthony Pathaw u la long uba kongsan tam ha ka tied da kaba kamai 41 ron naki 28 bol kaba la ïarap ïa ka Laitjem ban jop da 6 wiket, hynrei ïa ka nam Player of The Match la khur da u Manchester Pathaw.

Ha ka jingïakhun kaba bud, watla ka Thynroit ka la rai hi ban bol nyngkong hadien ba jop ïa ka toss, hynrei ka la mad ïa ka jingeh namar ba ka Cricket Lovers ka la lah ban ïaineh haduh kaba kut jong ka 20 over da kaba kamai 248 ron bad khyllem 7 wiket.

Ha kane ka inning la ïoh ban sakhi ïa ka spah ron na u Shavian Blah uba la long u namtam ha ka tied da kaba khyrwit haduh 134 ron naki 62 bol. U Aleric Wanswet – rangkawang bol jong ka Thynroit, u la khur 3/30 naki 4 ober.

Haba pyrshang beh ïa ka thong ka Thynroit ka la shah khanglad noh tang na bynta 101 ron naba khyllem lut baroh 10 wiket haka 16.3 ober, u Sandy M Mulong u la kamai 21 ron naki 22 bol.

Ha kaba kut ka Cricket Lovers ka la jop kput ïa ka jingïalehkai da 146 ron, bad na ka liang jong u HabaRaj Kishor Yadav u la khur 2/11 naki 2 ober, hynrei ïa ka nam Player of The Match la khur da u Shavian Blah uba la kamai palat ïa ka spah ron.