SHILLONG, Jylliew 12: Ka lympung ïalehkai District Level Inter School Subroto Cup Football Tournament 2025 jong ki khynnah shynrang Under-17, ba la pynïaid da ka Ophis treikam jong u District Sports Officer ka East Khasi Hills District, ka la jam mynta sha ka final bad ki ar tylli ki kynhun kiba dang sah bad ki ban ïaknieh ïa ka nam lahduh kadei ka Shillong Vidhyalaya Secondary School bad ka O.M. Roy Memorial Higher Secondary School.
Baroh ar tylli ki kynhun ki la pynthikna ïa ka jaka jong ki ha ka final hadien ba ki la jop ïa la ki jong ki jingïakhun Semi-Final ba la long hynne ka sngi Palei ha madan SAI, NEHU, Shillong.
Haba phai sha ka semi final kaba nyngkong la sakhi ïa ka Shillong Vidhyalaya Secondary School kaba la pynliem noh ïa ka St.Anthony’s Higher Secondary School da 2-0 kol. ïa kine ki ar kol la thep da u Superlative khongngain (40’) bad u Kitbok Maskut (72’).
Ha ka semi final kaba ar ka O.M. Roy Memorial Higher Secondary School ka la pynjemkhnap ïa ka Umphyrnai Presbyterian Secondary School da 4-0 kol ban rung sha ka final. U Marbiang Kharbhih (30’, 57’) u la ïoh ban thep ar kol, nangta u Menangpyndap Khongjee (36’) bad u Lamshai Jana (59’) ki la pynkhih mar kawei.
Kumba ka paw mynta, kaba dang sah mynta ïa kine ki arliang, kata ka Shillong Vidhyalaya SS bad ka O.M. Roy Memorial HSS ka long ka final ha kaba kin ïaknieh mano ban long ka lahduh jong ka District Level Inter School Subroto Cup FT 2025 jong ka East Khasi Hills.
Ka final kan long ha kane ka sngi ka Thohdieng (13 tarik, Jylliew 2025) ha ka por 10 baje mynstep ha madan SAI, NEHU, Shillong.
