Jowai, Risaw 24: Ka Thangskai Tiger SC bad ka R.Shkenshynriah SC ki la jop ïa la ki jong ki jong ki jingïakhun jong ka lympung phutbol Super Division Football Tournament-2025 (kaba la tip kum ka 5th Kyrmen Shylla Contribution Trophy) jong ka East Jaiñtia Hills District Football Association (EJHDFA), kaba la long ha ka sngi Thohdieng, 24 tarik u Risaw, 2025 ha madan Artificial Turf, Diengshynrum, Khliehriat.
Ka Thangskai Tiger SC kala pynliem da 4-2 kol ïaka Dhana CSC, katba ka R.Shkenshynriah SC kala jop da 3-0 kol pyrshah ïa ka Chiehruphi SYWSC.
Ha ka jingïakhun ba nyngkong, ka Thangskai Tiger SC ka la pynskhem ïa ka jingkyrmen ban khur ïa ka jingjop da kaba lamkhmat 3-0 tang ha ka kylla step lyngba ki kol kiba la thep da u Pynthymme Rymbai (5 & 27 P’) bad u Suting Syrti (45+4’) shuwa ba u Solomon Sympli (62’) un bynrap shi kol ha ka kylla miet.
Ïa ki ar kol na ka bynta ka Dhana CSC la thep da u Apphira Sumer haka minit ba 54 (penalty) bad u Micheal Siangshai haka minit ba 90.
Katba ha ka jingïakhun kaba ar ka R.Shkenshynriah SC ka la pynkhihjar 3 kol ban pynliem ïa ka Chiehruphi SYWSC, bad ïa kine ki kol la thep da u Rakesh Pradhan (5’), kynthup bad ar tylli kiba la wan syndet syndet ha ki minit ba khatduh lyngba u Ribiang Dkhar (90’) bad u Goldenson Japui (90+2’).
Kin don biang ar tylli ki jingïalehkai jong ka Super Division Football Tournament-2025 ha kane ka sngi Saitjaiñ, 25 tarik Risaw, kaba nyngkong kan long hapdeng ka Sutnga SSCC pyrshah ïaka Shilliang Umshong SC, bud sa ka jingïakhun jong ka Lad-Rymbai B SC pyrshah ïaka Diengshynrum SC.
