Khliehriat, Nailur 11: Ka lympung ïalehkai phutbol jong ka kyrdan 2nd Division bala pynïaid da ka East Jaiñtia Hills District Football Association kaba la long ha ka Sngi Balang (11 tarik u Nailur) ha madan Artificial Turf, Diengshynrum, Khliehriat.
Haba phai sha ka jingïakhun ba nyngkong, la sakhi ïa ka kynhun ïalehkai jong ka Ladrymbai Dongwah SC kaba la pynliem noh da 3-0 kol ïa ka Pamra Paithlu SC, ïa ki kol na ka Ladrymbai Dongwah SC la thep da u Samuel Pala haka minit ba 51 & 72 bad u Aerial Najiar haka minit ba 63.
Ha ka jingïakhun kaba ar ka R. Madanpynriang SC ka la lah ban pynliem noh da 2-0 kol ïa ka Moosianglamare New YWOSC, ïa kitei ki kol na ka R. Madanpynriang SC la thep da u Donaldo Dkhar ha ka minit ba 57 bad u Obadaia Bareh haka minit ka 80+2 lyngba ka (free kick).
Katba ha ka jingïakhun kaba lai hapdeng ka Kairang SC pyrshah ïa ka Iapmala UTD SC kila poi sha ka jingïakhaid da mar shikol 1-1, ïa ka kol na ka Kairang SC la thep da u Rimon Nongtdu haka minit ba 80+1, ïaka kol na ka Iapmala UTD SC la thep da u Arky Lamo haka minit ba 58.
