Shillong, Naitung 03: Ka jingïakhih shong kyllain myngngor jong ki nonghikai adhoc hapoh ka shatri jong ka Federation of All School Teachers of Meghalaya(FASTOM) ka la jam sha ka sngi kaba hynriew ha ka sngi u Blei, hadien ba ki nonghikai ha ka sngi Saitjain ki la shim ïa ka rai ban bteng beit ïa ka jingïakhih jong ki ban ap beit ïa ka jingïalang ka Kynhun Myntri ba kan pynmih ïa ka hukum ba kan kyntiew tulop ïa ki da 18 hajar bad ka jingkyntiew tulop ba man u snem(increment) da 5%.
Ha kane ka sngi la sakhi ïa ka jingwan ai mynsiem jong ki nongïalam jong ki seng bhalang ïa ki nonghikai kiba shong kyllain myngngor bad sahmiet ha jaka pynïeng kali ha Additional Secretariat ba kynthup ïa u Pastor Kyrsoibor Pyrthuh na ka TUR, ka Kong Bety Jyrwa President ka HNYF Women’s Wing bad ki nongïalam ki seng saiñ pyrthei ba kynthup ïa u Bah Process T Sawkmie u MLA ka Mawlai, u Samla Fernandez S Dkhar u President jong Meghalaya Pradesh Trinamool Youth Congress Committee.
Haba ai jingkren sha ki nonghikai u Bah Process T Sawkmie u la kyntu ïa ki nonghikai ba kin ïengskhem beit triang ha ka jingdawa jong ki tad haduh ba kin ïoh ïa u soh uba ki dawa. Shuh shuh u la kyntu ïa ki ba kin duwai na bynta ka sorkar bad ka kynhun myntri ba u Blei un pynum ïa ka dohnud maw jong ki. Ha kaba ïadei bad ka jingkam ka sorkar ba kam don pisa ban kyntiew tulop ïa ki nonghikai u Bah Process u la ong ba “Lada ka sorkar ka ju shimram na bynta ban pyntei ïa kino kino ki projek ha ka jylla ka dei ruh ban leh da kane ka rukom na bynta ka tulop ki nonghikai.”
“Ha ka jingpeit jong nga kane ka kynrum kynram kaba pynlong haduh katne ka dei na ka daw ba kam don kano kano ka jingïatreilang hapdeng ka tnad pla tyngka bad ka tnad pule puthi bad ka jingbym don ki myntri kiba tbit ban trei ïa kane ka kam hynrei la shu pynïaid beit da ki IAS Ophisar” ong u Bah Process
Shuh shuh u la ban jur ba ïa kane ka jingeh ki nonghikai ka sorkar ka dei ban shim da ki lad ki lynti ban weng syndon shijunom khanang ba kan nym pynmih jingeh hadien habud.
Ha kane ka sngi la wan ai mynsiem ruh da ka HNYF Women”s Wing ha ryngkat ka jingïasnoh mynsiem lem bad ki nonghikai ha kane ka jingïakhih jong ka da kaba ki syniang da ka um bad ki umsoh sha ki nonghikai.
Haba kren sha ki lad pathai khubor ka President jong ka HNYF Women’s Wing ka Kong Bety Jyrwa ka la dawa na ka sorkar ban pynurlong ïa kaei kaba ki nonghikai ki dawa namar ka dei kaba shonghok bad shong nia. Shuh shuh ka la ong ruh ba ka dei ka kamram jong ki MLA khamtam eh ki Myntri ban sngap ïa ka sur jingdawa ki nonghikai namar dei ma ki kiba ai jingnang jingstad tad haduh ba kin kynjoh sha ka kam nongmihkhmat.
“Nga don ka jingsngew synei kyrpang ïa ki longkmie kiba hap ban ieh shadien ïa ki khun ki kti, la ka iing ka sem ban wan ïakhih tang na ka daw ka jingkuman ka sorkar” ong ka Kong Bety.
Shuh shuh ha kane ka sngi la sakhi ïa ka jingwan ai mynsiem jong kiba bun ki riew shimet ha kaba ki la wanrah ruh ïa ka sha bad ki jingbam jingdih na ka bynta ki nonghikai kum shibynta ban ïa snoh mynsiem lem bqad ki ha kane ka prokram jingïakhih kaba ki pynlong
