Nongstoiñ, Lber 01: Kum shi bynta ban ai ka jingpynshai bad ka jingpyntip halor ki kam aiñ kiba ïadei bad ki khynnah Skul bad ki jingmyntoi kiba ki paidbah ki dei ban ïoh ha kaba ïadei bad ki kam aiñ, ka ophis treikam jong ka District Legal Services Authority (DLSA) West Khasi Hills District Nongstoiñ, ha ka sngi thohdieng ka la pynlong ïa ka Awareness Prokram ha Khadsawphra College Mairang halor ka bynta, ‘Back To school Campaign’ bad ka NALSA ASHA Campaign.
Ïa kane ka Prokram la pynlong da ka jingthmu ban pynshai sha ki samla pule halor ka aiñ POCSO bad ka jingpynshai halor ka jingma jong ka jingshongkha khynnah, ka NDPS Act, Cyber security bad ka Right to Free Education.
Ha kane ka Awareness Prokram la sakhi ïa ka jingïadonlang naduh ka Chief Judicial Magistrate Cum Secretary DLSA ka kong D.M.K.S Shadap kum ka Riewshemphang, u bah R.Nongbri LAC, u SDSEO ka EWKHD u bah J.Thyrniang, U bah S.Kharmyndai SI na ka Police Dept., u Principal ka College u Dr. Boldness Nongum, ki nonghikai ha ryngkat ka jingwan ban sngap ïa kane ka jingpynshai da ki khynnah pule ka Khadsawphra College Mairang.
Ha kane ka Prokram la ïoh ïa ka jingpynshai ha kaba ïadei bad ka aiñ POCSO Act 2012, Prevention of Child Marriage Act, 2006,ka NALSA-ASHA Campaign, Ka NDPS Act, Cyber Security bad ka Right Of Children To Free Compulsory Education Act.
Ha kane ka juh ka sngi, ïa kane ka program la pynlong ruh da ka District Legal Services Authority West Khasi Hills District Nongstoiñ ha ka shnong Nongkasen Eastern West Khasi Hills District, ha kaba la wan ban ai jingpynshai da ka kong N.Tympuiñ LAC, u bah W.Nongsiej LAC bad na ka Ophis DCPU.
Ka phang ka long ka Nalsa Jagriti bad ka Asha Scheme, ka aiñ POCSO, ka hok jong ki briew kiba don jingduna ha ki dkhot met, ka Domestic Violence Act, bad kumjuh ka Mission Vatsalya. La wan ban sakhi ruh ïa kane ka program da ka jingdon u Sordar ka shnong Nongkasen u bah B.K Budnah lem bad ki paidbah nongshong shnong.
