Duriap ha ki lynnong kot ban synñiang ïa la u bynhei na ka bynta ka ri: Jambor War

Kynshi, Naitung 28: Kum ban bteng ïa ka jingrakhe ïa ka Bijli Mahotsav hapoh ka shatri jong ka Ujjwala Bharat, Ujjwala Bhavishya-Power @ 2047, kaba long shibynta na ka jingrakhe jong ka Ri India ïa ka Azadi Ka Amrit Mahotsav, mynta ka sngi ki bor pynïaid distrik jong ka Eastern West Khasi Hills District, Mairang ha ryngkat ka jingïatreilang jong ka NEEPCO, Shillong bad ka MeECL ki la pynlong ïa ka jingrakhe ïa ka Bijli Mahotsav ha Kynshi Bangla Dorbar Hall, Kynshi.
Ha kane ka jingïalang, u Executive Member ka KHADC u ba dei peit ïa ka tnat Ilaka, u Bah Jambor War u la long u kongsan ha ka jingdon ryngkat jong u Deputy Commissioner ka Eastern West Khasi Hills u Bah W. Nongsiej, u Additional Deputy Commissioner ka District, u Bah V.Swer, i Deputy General Manager ka NEEPCO, Shillong, i Kong Loretta A Kharmawphlang, ki nongtrei sorkar, ki nongïalam shnong, ki dkhot seng treilang (SHG), ki principal jong ki skul ka thaiñ, ki nonghikai bad ki khynnah pule.
Ha ka jingkren ka jong u kum u kongsan, u Bah Jambor War u la kren shaphang ka jingrakhe ïa ka Azadi Ka Amrit Mahotsav ha sawdong ka Ri India bad u la ong ba kane ka jingrakhe, ka pynïoh ïa ka lad ka kabu ïa ki nongshong shnong, ban kynmaw burom ïa ki riew khraw ïaleh laitluid na ki bynta bapher bapher jong ka Ri India. Ka long ruh ka rynsan ban phai dien sha ki sienjam kiba la ïoh ban ïaid ha ka liang jong ka roi ka par ha kiba bun ki bynta bad ka jingrakhe ïa ka Bijli Mahotsav, ka long kawei na ki bynta jong ka jinglehkmen ïa ka roi ka kiew kaba ïadei bad ka tnat pynmih bording.
Haba kren halor ka jingïaid lynti jong ka jingïaleh laitluid ka Ri India, u kongsan u la pynkynmaw ïa baroh kiba la sakhi ïa kane ka prokram, ba ka jingtrei shitom bad jingïaishah jong ki riewshlur ïaleh laitluid ka ri, ka la wanrah ïa u soh ba thiang ha kaba ka Ri India ka la ïoh ïa ka jinglaitluid na ka jingsynshar phareng ha ka 15 tarik u Nailar 1947, hapoh ka jingïalam ba shlur jong u Mahatma Gandhi.
Ha kane ka sngi, u Bah Jambor War u la kyntu ruh ïa ki khynnah skul kiba la ïa wan sha kane ka prokram, ba kin duriap bad trei minot ha ki jingpule ki jong ki, khnang ba kin lah ban noh ïa la u synñiang u bynhei ban kyntiew ïa ka ri bad ka jylla ha ki por ki ban bud.
Ha kane ka prokram, na ka liang jong ki nongïoh bhah na ki skhim bapher bapher jong ka tnat bording, ki la ïoh ruh ban ïathuh shaphang ka jingshem bad jingïoh jingmyntoi jong ki na kitei ki skhim. La sakhi ruh ïa ka jingpyni ïa ki phlim shaphang kiba bun ki bynta jong ka jingtreikam ka tnad pynmih bording bad la pynphuh pynphieng shuh shuh ïa kane ka jingrakhe, da ka skit na ka Kynshi Higher Secondary School, Kynshi bad ka ‘action song’ na ki khynnah skul ka St. Dominic Savio Secondary School, Kynshi.
Kiwei kiwei pat kiba la kren ha kane ka sngi, ki kynthup ïa u Deputy Commissioner ka Eastern West Khasi Hills District, u Bah W.Nongsiej, i DGM ka NEEPCO, Shillong, i Kong Loretta A Kharmawphlang, u Superintending Engineer ka (Khasi Hills) Distribution Circle, MeECL, u Bah K.Chyrmang, u Assistant Executive Engineer ka Mairang Distribution, MePDCL, Mairang, u Bah Banpynbitlang Kharkamni bad u Sordar ka Shnong Kynshi Bangla, u Bah Aibankupar Syiemlieh u ba la pynïaid ïa ka prokram.