Shillong, Naitung 29 : Ka kynhun ïalehkai jong ka Shillong Lajong ka la bteng biang ïa ka nam jop ha ka Durand Cup hadien ba ka la lah ban pynliem pat sa ïa ka Rangdajied United FC da 3-1 kol ha ka jingïakhun kaba itynnad bha kaba long ha ka janmiet sngi Ba-ar ha Jawaharlal Nehru Stadium, Polo, Shillong.
Kumban shu kdew hangne, ka Shillong Lajong ka la lah ban pynliem haduh 6-0 kol ïa ka Malaysia Armed Forces FT ha ka jingïakhun sdang kaba long ha ka 26tarik mynta u bnai.
Da katei ka namjop, ka Shillong Lajong ka la ïoh mynta 6 point na ki arsien ïakhun bad ki 9 kol.
Haba phai sha ka jingïalehkai, dei ka Shillong Lajong kaba ïoh ban thep kol nyngkong ha ka minit kaba 45+1 lyngba u Sana Mylliempdah, katba ïa ka kol kaba ar pat la ïoh ban thep da u Damaitphang Lyngdoh ha ka minit kaba 66 katba ïa ka kol kaba lai pat la ïoh ban thep da u Gladdy Kharbuli ha ka minit kaba 80.
Na ka liang ka Rangdajied United FC pat ïa ka shi kol la ïoh ban thep da u Mebanshngain Kurkalang ha ka minit kaba 59.
