Durand Cup: Ar sien lynter rung semi final ka Lajong; wanphai nadien ban pynliem da 2-1 kol ïa ka Indian Navy FT
Sawa ka madan JN Stadium da ka kyntien ‘Siuu’ hadien ba pynkhihjar u Everbrightson Sana lyngba ka penalty.
Shillong, Nailar 16: Ka Shillong Lajong FC ka la pynkhihwin ïa ka jingïakhun Quarter final kaba nyngkong jong ka 134th IndianOil Durand Cup 2025 da kaba wanphai nadien ban pynliem noh ïa ka Indian Navy FT da 2-1 kol kaba la long ha Jawaharlal Nehru Stadium ban pynthikna ïa ka semi-final kaba ar sien lynter ha kane ka lympung.
Ki ar tylli ki kol kiba la thep ha ka kylla miet da u Damaitphang Lyngdoh (69’) bad u Everbrightson Sana Mylliempdah (79’) ki la pynskhem ïa ka jingjop ïa ka Shillong Lajong kaba ïakhun hala ïing hadien ba u Vijay Marandi u la pynkhih ïa ka kol kaba nyngkong ha ka 38 minit na ka bynta ka Indian Navy ban lamkhmat ïa ka kylla step.
Ka Shillong Lajong ka la sdang ïa ka jingïalehkai da 4 ngut shadien, 3 hapdeng bad 3 hakhmat (4-3-3 formation) ha kaba u Head Coach u Birendra Thapa u la jied ïa ki rangïalehkai ba shakhmat jong u kiba long u Phrangki Buam, Everbrightson Sana bad u Sheen Stevenson katba u Damaitphang Lyngdoh, Treimiki Lamurong bad u Gladdy Kharbuli hapdeng madan. Ki rangapdien la lamkhmat da u Rudra Ved bad u Kenstar Kharshong ha pdeng bad u Kitboklang Khyriem bad u Saveme Tariang kum ki wing back nangta u Siwel Rymbai kum u nongapkol.
U Head Coach ka Indian Navy u Raman Rai u la sei ïa la ka jong ka kynhun ha ka rukom ïalehkai kaba long 4-4-2 ha kaba u Captain Bhaskar Roy u la ap pahara ïa ka kol bad la ïalam khmat da u Sreyas V.G bad u Vijay Marandi.
Ha ka kylla step la sakhi tang khyndiat eh ki jingpyrshang thep kol kiba paka hynrei kim shym la seisoh. Dei tad haduh ka minit kaba 35 ba ka jingïalehkai ka la khie im, ha kaba ka Indian Navy ka la ïoh ban lamkhmat. Ka goal kick kaba jam kaba la shut da u Bhaskar Roy la shimti da u Roshan Panna shuwa ban pashat sha u Vijay Marandi hapoh phyllaw kol bad thep jlang ïa ka bol sha kol.
Kane ka kol ka la wan hadien baroh ar ngut ki rangapkol ki la sei ïala ka jong ka sap ba kyrpang ban khanglad ïa ki bol, ha kaba u Siwel Rymbai u la sei madan ïa ka jingtbit jong u ban kyntait ïa ka jingpyrshang thep kol jong u Sreyas V.G bad ha kawei ka liang u Bhaskar Roy u la trei shitom ban khanglad ïa u Gladdy Kharbuli.
Ha ka kylla miet ka Shillong Lajong ka la ïai pynbor ban tur shakhmat ban wad ïa ka kol ban pynïakhaid hynrei ka la shah khanglad bun sien namar ka jingïada kaba pyrkhing bha jong ki rangapdien ka Navy. Ki la don ruh ki kabu kiba la sepei jong u Everbrightson Sana bad u Sheen Stevenson.
Ka jingpyrshang ban pynïakhaid ka la seisoh ha ka minit kaba 69 hadien ba ka bol kaba la thmu pashat hapoh phyllaw kol da u Damaitphang Lyngdoh na ka liang kadiang ka la rung shapoh kol.
Ka Shillong Lajong ka la ïoh ban lamkhmat kylla ïa ka jingïalehkai ha ka 79 minit hadien ba u Everbrightson Sana ula pynïoh ïa ka penalty na ka bynta ka kynhun hadien ba u la shah pynur ha u Novin Gurung. Une u rangïalehkai ba dang 20 snem u la shim ïa kane ka kabu bad khlem jingartatien u la thep jlang ïa ka penalty kaba la pynkkhihwin ïa ki nongkyrshan.
Ka Shillong Lajong ka la pynskhem triang ban khanglad ïa ka Indian Navy bad ka la ïada tyngeh ban pynthikna ba kan poi sha ka jingïakhun semi phainal kaba lai jong ka Durand Cup.
Baroh 43 tylli ki jingïalehkai jong ka 134th IndianOil Durand Cup la pyni LIVE lyngba ka Sony Sports Network (Sony Ten2 HD) kumjuh ruh ha ka SonyLiv OTT.