Durand Cup 2025: Kyrmen ka Rangdajied ban ban pynkhie im biang ïalade da kaba jop ïa ka MAFFT

Shillong, Nailar 04: Ka Rangdajied United kan khmihlynti ban pynkhie im biang ïa ka jingkyrmen hadien ba ka la mad ïa ka nam rem ha ka jingïalehkai ‘Shillong Derby’ pyrshah ïa ka Shillong Lajong FC da 3-1 kol bad ban pynkhie im biang ïa ka jingïakhun jong ka ha ka Group E ha kane ka Durand Cup 2025 ha kaba kan ïakhun pyrshah ïa ka Malaysian Armed Forces FT ha ka jingïalehkai ba ar ha kane ka sngi Hatmajai. Ka jingïalehkai kan sdang ha ka por 7 baje janmiet ha JN Stadium, Polo.
Haba ïakhun biang sa shisien hakhmat ki paidbah nongkyrshan, ka Rangdajied ka tip ba ki 3 poiñ ki long kiba kongsan lada ka kwah ban donlang ha kajuh ka thup ïaknieh rung bad ka Lajong kaba lamkhmat ha khliehduh jong ka Group bad ka NorthEast United FC kaba bat ïa ka burom lahduh.
“Nga kyrmen ba ki khynnah shynrang ki la ïoh jinghikai na ki jingbakla kiba Ngi la leh ha ka jingïalehkai ba la dep. Ngin sa pyrshang ban wanrah ïa ka jinglehkai kaba bha tam ha madan, bad Nga kyntu ïa ka kynhun ban ïakhun da ka jingsngewtynnad ïa ka jingïalehkai bad ban trei shitom ban ïoh ïa ka resol kaba bha,” la ong u coach ka Rangdajied u Aibanjop Shadap.
Katba na ka liang jong ka kynhun shipai na Malaysia pat ka la pyndep ar tylli ki jingïalehkai, ha kaba ka la shah rem ha ka Lajong da 6-0 bad ha ka NorthEast United FC ka la shah rem da 3-1. Watla ka la pyni ïa ka rukom lehkai kaba kham bha ha ka kylla miet pyrshah ïa ka NEUFC ban pynkut da kaba thep ïa ka shi kol ha ki minit shuwa ban wai lyngba u Muhammad Amir Faisal, ki la mad shibun ki jingduna ha ka liang ki rangapdien bad mynta kam don jingkyrmen shuh ban ïaknieh rung sha ka wat ïakhun Knock Out.
“Ngi tip ba man la ki jingïalehkai ha kane ka lympung ka dei kaba jwat bad ka Rangdajied kan nym long kaba pher. Ka jingthmu na ka bynta jong Ngi ka long ban pynjanai ïa kawei pa kawei ka jingïalehkai bad ban ïakhun katkum ka bor jong Ngi. Ki rangïalehkai ki la kut jingmut ban ai ïa kaba bha tam bad ban pynbor ban ïoh ïa ka resol kaba bha,” la ong u Masrizar bin Mizalan, assistant coach jong ka Malaysian Armed Forces FT.
Na ka bynta ka Rangdajied, ka rukom ïalehkai kaba jaijai bad kaba ryntih kan long kaba kongsan. Ki la duh bor ha ka jingïakhun ba nyngkong tang namar ba ka kynhun ka la leh bun tylli ki foul, watla ka la pyni ïa ka jingtbit ban tur shakhmat. U coach kumjuh ruh ki rangïalehkai kin khmihlynti ïa ka jinglehkai kaba kham janai bad kaba kham thikna ha kane ka sngi Baar pyrshah ïa ka Malaysia.
Da kaba sah sa tang katto katne ki jingïalehkai ha ka group stage, kawei pa kawei ka point ka la sdang ban long kaba kongsan. Na ka bynta ka Rangdajied United ka lynti ban poi sha ka jingkhun Knock out ka dang plie hynrei ka donkam ban jop. Kane ka jingïalehkai jong ka sngi Ba ar ka lah ban long ka jingkylla ha ka Group E namar ka lah ban rai ïa kino ki kynhun kiba don jingkyrmen ban jam shakhmat.