Durand Cup 2024: Ha ka sien ba nyngkong yn ïoh ka Shillong ban pynlong ïa ki jingïalehkai

Shillong, Naitung 03: Ka madan ïalehkai JN Stadium kaba ha nongbah Shillong kan sa ïoh pdiang ban pynlong katto katne ki jingïalehkai na kawei ka Group na bynta ka lympung ïalehkai phutbol kaba 133 jong ka Durand Cup mynta u snem, ka ban sdang naduh ka 27 tarik Naitung, ha kaba ïa ka final la pynkhreh ha ka 31 tarik u Nailar, 2024.
Ka jingïoh jong ka nongbah Shillong ban ïoh pynlong ïa ki jingïalehkai ka 133th Durand Cup 2024 ka long ruh ka jingpynskhem ïa kaei kaba la dep kular ha u snem ba la dep. Watla ka JN Sports Complex, Polo, ka dang shimpor ban maramot pynbha ïa baroh sawdong ka madan, naduh ka jaka shong paidbah, hynrei na ka liang jong ka HQ Eastern Command jong ka Indian Army ka la rai ban pynlong ïa katto katne ki jingïakhun jong ka Durand Cup ha nongbah Shillong.
Nalor ka Shillong, ka Jamshedpur ka dei kawei pat ka nongbah kaba la shah jied ha ka sien ba nyngkong ban ïoh pynlong ïa ki jingïalehkai lympung Durand Cup mynta u snem.
Ha ka sien pynlong kaba 133 sien, yn sakhi haduh 24 tylli ki kynhun, ba kynthup naduh ki klob ïalehkai Indian Super League, I-League bad kiwei kiwei ki kynhun ba la khot sngewbha, bad kumjuh ruh ki kynhun na ki shipai. Kumba long ha u snem ba la dep, la khmihlynti ruh ïa ka jingwanïashimbynta jong kiwei pat ki kynhun kiba nabar ri.
Baroh kin don haduh 43 tylli ki jingïakhun kiba yn pynïalehkai katkum ka ‘round-robin league-cum-knockout’, ha kaba ïa ka final yn pynlong ha Vivekananda Yuba Bharati Krirangan (VYBK) kaba ha nongbah Kolkata.
ïa kitei ki 24-tylli ki kynhun la phiah sha ki hynriew tylli ki thup lane Group, ha kaba yn jied tang 8 tylli ki kynhun kiba poi kyrdan ba shakhmat – kynthup bad ar tylli ki kynhun kyrdan ba ar ba kynsai tam ki ban jam sha ka wat ïakhun knockout stage.
Katkum ka kyrwoh ba la pyllait, la ïoh jingtip ba ka Kolkata kan ïoh pynlong ïa ki jingïakhun jong lai tylli ki Group, katba ka Kokrajhar, Shillong ryngkat bad ka Jamshedpur kin ïoh pynlong jingïalehkai tang mar kawei ka Group.
Ka jingpyn-i-nam ïa kine ki lai tylli ki trophy jong ka Durand Trophies kan long ha ka 10 tarik mynta u Naitung, ha kaba yn pyllait paidbah ha nongbah New Delhi, shuwa ba kin poi sha Kolkata na bynta ka sngi plie pyrda ïa kane ka lympung ha ka 27 tarik Naitung ha VYBK.
Kum ka dak ban tip bñiah halor ka histori jong kane ka lympung, ka Durand Cup ka dei ka lympung phutbol kaba la rim tam ha dewbah Asia bad kaba lai ha ka pyrthei. ïa kane ka lympung la pynlong da ki shipai jong ka ri India na ka bynta ki lai tylli ki Service, hynrei mynta ka la kylla long ka lyngkha kaba pynkha ïa ki sap ïalehkai phutbol na bynta ka ri India, kumba la sakhi ha ki snem ba ladep.