Nongstoiñ, Ïaïong 25: Ka pyntha Umyiap ka dei kawei na ki pyntha rep kaba pawnam bha ha ka jylla bad lah ban ong ba ka dei ruh ka pyntha kaba nyngkong ha ka jingheh. Katei ka pyntha ka don ha ki bynta pdeng jong ka West Khasi Hills District, kaba don haduh khatar tylli ki shnong kiba katei ka pyntha rep ka long kum ka thiar kaba pyndap khaw ïa ki paitbah ha kitei ki shnong bad lada kheiñ kyllum ïa ki longïing ki la don palat hajar.
Nalor kata ki don kiwei pat ki shnong kiba kham jngai na katei ka pyntha rep kum ka shnong Domwahlang, Khliehmawlieh, Mawlangkhar, Umlieh bad kiwei kiwei kiba don byllai ki jaka rep ha katei ka pyntha. Ki nongshong shnong kiba rep ba riang ha katei ka pyntha, kim ju pynsep ei ïa ki jaka rep jong ki ha baroh shi snem, namar tang shu dep lum ïa u kba ki sdang sa ka rep jur tlang kum u phan, Kajor, sohlakum, beet.
Hynrei ha kine ki snem ki nongrep ki la ïaleh ban rep ïa u motor namar ba ha shuwa ban poi ka por rep kba ki la dep ban kheit bad ban lum ban lang. Wat la ki don kiba rep lang ïa kiwei ki jait jhur hynrei u motor u dei uba kongsan. Ha kine ki sngi haba ïakren bad ki nongrep jhur ha katei ka pyntha, ki la ïathuh ba mynta u snem ka jingpynmih motor ka kham duna lada ïanujor bad u snem ba la dep.
U Bah K.Wahlang uwei na ki nongrep u ba trei shitom bha ban rep motor ha katei ka pyntha, u la ong ba ha u snem ba la dep u la ïoh lum palat shi lak tyngka tang na ka ba die motor hynrei mynta u snem te ka kham duna namar u motor um da soh bha. Nalor kata ha ka por ba u dang sdang ban phuh syntiew bun kiba bam khñiang bad ïap tram. Watla katta ruh ka jingmih na kaba die ïa utei u jhur ka dang ïa biang wat la ka jingïoh nong ka duna ruh.
Haba kylli pat haduh katno kilo u symbai ki nongrep ki ju thung man la u snem, u la ong ba ki don kiba thung san kilo, kiba thung shiphew haduh laiphew kilo. Haba kylli pat shaei ki ju shalan ïa ki jhur don kiba ong ba lada ki nongrep ki kheit lang ha ka juh ka sngi, ki ju pynlang ha kajuh ka jaka bad ki sa pynkit da ka Mahindra Pickup sha Shillong, hynrei kito kiba rep khyndiat pat ki ju leit buh ha ki nongdie jhur ha Nongstoiñ man ka sngi.
