Duleep Trophy: Shah jied ki arngut ki nongïalehkai cricket ka jylla ha ka kynhun North East Zone

Shillong, Nailar 29 : U Dippu Ch Sangma bad u Kishan Lyngdoh ki arngut ki rangïalehkai cricket ka jylla ki la shah jied ha ka kynhun jong ka North East Zone kaban ïakhun ha ka lympung ïalehkai Duleep Trophy. U Chiang D Shira un ïalam ïa katei ka kynhun kum u manager.
U Sangma u la mih mdan 45 sien ha ki jingïalehkai ba la pynong da ka BCCI na ka kynhun jong ka Meghalaya bad u la khyrwit kawei ka spah ron (century) bad ar tylli ki shiteng spah ron ha ka Ranji Trophy, kawei kadei ha ka jingïalehkai first-class Ranji Trophy bad kawei ha ka ïalehkai 50 over Vijay Hazare Trophy. U la khur ruh 40 wicket ha kitei ki ar jait ki jingïalehkai bad ha ka T20 Syed Mushtaq Ali Trophy.
Katba u Kishan Lyngdoh, uba la ïalehkai dang katto katne por na bynta ka jylla hynrei u la ïoh ban kamai bun ron ha ka Syed Mushtaq Ali Trophy 2021, da kaba khyrwit 247 ron ha ki san inning da kaba khyrwit lai tylli ki spah ron bad don ha ka strike rate kaba 143.
Ka Duleep Trophy kadei ka jingïalehkai first-class knockout tournament kaba pynïalehkai ha ki kynhun jong ki zone. Kane kadei ka sien kaba nyngkong ba ka North East ka la shah kynthup, katba ka Assam bad Tripura ki ïalehkai na ka East Zone.
Baroh ki 15 ngut kiba la shah jied na bynta ka NEZ kidei ki rangïalehkai trai jylla. Ka kynhun kan sa ïakhun pyrshah ïa ka West Zone naduh ka 8 tarik Nailar