Mawkyrwat, Jylliew, 28: Ka long kaei kaei ka kam kaba wanrah ïa ka jingduh-nong kaba khraw ha kiba bun ki liang la ka long ha ka aïom ba wan ka lyiur ne wan ka tlang ruh namar ka jinglip lait ba khah khah ka jur bha wat ha ki jaka sor ne ha nongkyndong ruh, namar “Haba wan ka lyiur ba don ka jinghap slap kaba jur ki ju ong ba dap um ne shlei um palat ka jaka pynlang um (Damsait) bad haba wan ka tlang pat ki ong ba duna um palat”, kane ka jingong ka ju mih manla ka por bad man ba thut ka bording.
Halor kane ka jinglip lait ba khah khah, na ka liang u nongthoh khubor haba ïoh ban leit ïa kynduh bad ki katto katne ngut ki briew kiba ju im kamai ja kpoh lyngba ki kam ba pyndonkam da ka bording ne electric ki la pynpaw ba kane ka jingpynlip lait ba khah khah ka long kaei kaei ka bym lah ban pdiang bad bym lah hi ruh ban khlem da ud ne pynsngew, namar ka jingpynlip ba khah khah ka long ka jingduh nong ha kiba bun ki bynta ym tang ki nongtrei bylla ha ki karkhana, ki nongtrei ha ki dukan ba buh computer bad kiwei kiwei hynrei wat ki ophis sorkar ruh ki duh nong khamtam kito ki ophis ki bym don la ki jong ki generator.
Shuh shuh ki la pynpaw ruh ba kane ka jinglip lait kam ju jia tang ha ka por mynsngi, shiteng sngi hynrei wat ha ki por janmiet ne mynmiet ruh ha kaba bun ki kam ki la sah kut ym lah shuh ban pyndep ha ka por kaba biang. “Ma ngi kiba bun dukan welding lei lei bun ki kam ki sah kut noh namar ym lah ban pyndep ha ka por kaba biang kumba la ïa kut bad ki trai ba phah shna”, ong uwei u rangbah ba buh dukan welding.
Haba phai pat ha ki dukan ba buh ki komputer bad Xerox ki la pynpaw ba ka jingpynlip lait ka long ka jingduhnong namar ym lah ban pyndep ha ka por kaba biang ïa ki kot ki sla jong ki briew khamtam lei lei mynta ka dei ka por ban pyntype ïa ki jingkylli jong ki skul bapher bapher, “Lada ka lait ka lip khah khah, ngin nym lah shuh ban pyndep khamtam lei lei kito ki jingkylli kiba lah jan dei ka por”.
Ha kawei pat ka liang lada lip lait ka long ka jingduh-nong ruh na ka bynta ki khynnah skul bad ki samla pule jong ka dong ka thaiñ ha kaba mynta lei lei ka dei ka por ba long egsam, namar ban pule kot khlem don ka jingshai ka long kaba eh shisha, hooid ki don ki jingpynshai kum ki mombati, torch-light bad kiwei kiwei hynrei ka kham pher lada don ne meh ka lait ne bording.
“Lada ka pynlip lait khah khah kumne, hato ka bill ban siew ruh kan pynduna ne kumno?”, kylli ki paidbah namar ka jinglip lait ka kham bun kynta ban ïa ka jingmeh ne ban ïoh pyndonkam ïa ka lait.
Kumta ki buh ka jingkyrpad ïa ka ophis Meghalaya Power Distribution Corporation Limited (MePDCL) jong ka Mawkyrwat Division ba sngewbha ban pyrkhat lem na ka bynta ki paidbah. Hooid! kum ki paidbah ki sngewthuh ïa ki jingeh ba kum ka ophis bad ki nongtrei jong ka ki ïa kynduh bun ki jingeh ban pynbiang ïa ka jingduh ka bording khamtam lei lei haba wan u slap bah bad jur ka jingwan jong ka lyer, hynrei lada long kaba lah kum ka ophis ka dei ban kyrpad ïa ki bor ba ha jrong ba kin leh ei ei halor kane ka bynta namar lada bun kynta ka jinglip lait ban ïa ka jingmeh kata ka la long ka jingduh-nong kaba khraw.
