Nongstoiñ, Naitung 2: Ka jingbym ïoh slap ha ka por kaba biang ka la wanrah ïa ka jingduhnong kaba khraw ïa ki nongrep ha kylleng ki jaka. U bah Grosspar Parïong sordar barim ka shnong Mawkamoit kaba don ha ki thaiñ Myrïaw, Eastern West Khasi Hills District, haba ïakren bad u nongthoh khubor, u la ong ba ki nongshong shnong ha katei ka thaiñ ki dei kiba khlaiñ bha ha ka rep sohsaw bad na ka jingpynmih sohsaw na ki shnong ha katei ka thaiñ, la lah ban pynïaid ïew ha kylleng ki jaka bad wat ha sor Shillong ruh la lah ban pynïaid ïew da ki hajar kilo man la ka taïew.
Nalor kata u la ong ba wat haduh Guwahati ruh lajan man ka sngi la lah ban pynpoi da ki Mahindra pickup. U la ong ruh ba mynta u snem ka jingpynmih sohsaw ka duna haduh katta katta, namar ha ki snem ba la dep ba u slap u wan ha ka por ba biang, shi tynrai u soh saw lah ban pynmih san haduh hynriew kilo hynrei mynta u snem pat na ka shi tynrai lah ban pynmih tang ar kilo ne tam.
U la ong ruh ba lada dei ki jaka rep kiba don ki tyllong um ha jan ki nongrep ki hap ban lei tai um da kaba synreit da ki pump, hynrei ha kito ki jaka rep kiba jngai bha ka um ki hap ban shu iehnoh kumto bad ha ka por ba shit kyrang palat ka sngi ki sla ki long kumba ki la jan ïap bad dei na kata ka daw ba ha ka por bas dang phuh syntiew ki soh ki tlor noh.
U bah Parïong u la ong ruh ba ki nongrep ki la sdang ban kheit soh la ar taïew, hynrei ka jingpynmih soh kam long kumba pynmih ha ki snem ba la dep. Wat la katta ruh u la ong ba ha kine ki sngi ki la lah ban pynpoi sohsaw sha Mairang, Nongstoiñ, Mawkyrwat bad haduh Shahlang lajan man ka sngi. Haba kylli pat katno ka dor shi kilo ki nongdie sohsaw ki ju thied ha kine ki sngi, u la ong ba haduh mynta ka sngi ka dor ka dang neh laiphew tyngka shi kilo.
U la ong ruh ba ka jingneh jong ka dor ïew naduh ba sdang kheit haduh mynta ka dei namar ba ka jingpynmih soh na man la ki jylla ka duna bha namar ka jingrang tyrkhong palat ka pyrthei. Nalor kata u la ong ruh ba ha katei ka thaiñ ka shnong Mawkamoit ka dei ka jaka pdeng ba baroh ki shnong kiba doh ha katei ka thaiñ ki pynpoi ïa u sohsaw bad baroh ki kali kiba wan kit soh ki ïeng ha katei ka jaka ban ap ïa ka jingpynpoi soh jong ki nongrep.
