Duhnong ka ri India ym duna 4.5 lak klur na ka jingpynlong ïa ki elekshon: Temjen Along

Shillong, Lber, 30: “Ngi duh nong kumba T.3.5 lak klur haduh T.4.5 lak klur ha ka jingpynlong ïa ki ilekshon ha baroh kawei ka ri India,” la ong u Myntri ka tnat Higher Education bad Tourism ka Sorkar Nagaland u Temjen Imna Along uba long ruh u nongïalam jong ka Bharatiya Janata Party (BJP) ha ka jylla Nagaland haba kren ha ka jingïalang ïamir jingmut ïa ka jingtyrwa ka Sorkar NDA ba ïalam da ka BJP ban pynlong ïa ka ri India, “kawei ka ri, kawei ka elekshon.”
Ïa ka jingïalang ïamir jingmut la pynlong da ka Deparment of Political Science jong ka KL Bajoria College, Shillong ha ka sngi Saitjaiñ.
U Temjen uba la long kum u kongsan ha kane ka jingïalang ïamir jingmut u la ong shuh shuh, “hato phi lah ban mutdur ba ka jinglut ban pynlong ïa ka elekshon ha baroh kawei ka ri ka kot 50% na ka mang tyngka ba la bhah sha ka tnat ka Koit ka Khiah jong ka Ri bad kumba 33%-34% na ka Mang Tyngka jong ka tnat Pule Puthi”.
U la kam ba ka jingpynlut ban pynlong ïa ki 34 tylli ki elekshon ha baroh kawei ka ri India ka la kynjoh haduh T.4.5 klur, kaba long 1.5% na ka Gross Domestic Product ne ka ïoh ka kot jong ka Ri bad bynrpa ruh ba ka jingwan jong u sha ka Jylla Meghalaya ka long ban pynshai paidbah ïa ka jingpyrshang jong ka Sorkar NDA ba ïalam da u Narendra Modi ban pyntreikam da ka ‘One Nation, One Election’.
Haba pynshai shuh shuh halor ka phang ‘One Nation, One Election’, u Temjen u la ong “ka ilekshon jong ka Sorkar Pdeng, ki elekshon jong ki Sorkar Jylla kin hap ban long ha kajuh ka por khnang ban pynduna ïa ka jinglut jingsep bad ka jingpynsepei ïa ka pisa u paidbah.”