Nongpoh, Naitung 05: Uwei u rangbah briew na ka Shnong Khyndewso ba hab ha Mawlasnai Police Outpost, u la duh ei ïa la ka jingim, hadien ba kawei ka Kali Bolero Pik-up ka la ïuh kynsan ïa u na ki bynta jong ka syngkai bad kaba la shu phet krad noh na katei ka jaka, khlem da ïoh bat satia.
Une u rangbah uba la duh ïa la ka jingim, la tip kyrteng kum u Risdar Mynsong, ha ka rta kaba 45 snem eiei, na ka shnong Khyndewso bad halor kane ka jingjia, ki la don ki paidbah ba ïohi bad kim lah satia pat ban bat ïa ka number kali, ba katei ka Kali Bolero Pick-up ka la phet krad da kaba sted na katei ka jaka.
Kumba la ïohlum jingtip, la ong ba ïa une u rangbah la pynkitnoh mar mar sha Civil Hospital Nongpoh ban ïoh ïa ka jingsumar, hynrei hadien ba la poi ha Civil Hospital Nongpoh, la pynbna da ki Doctor ba u la khlad noh na ka jingjur katei ka jingmynsaw na katei ka jingjia.
Na ka liang ki bor pulit na Mawlasnai ruh tang mar ïatip halor kane ka jingjia, ki la wan ban pynlong ïa ka jingtohkit bad ki dang pyrshang ban wad jingtip shaphang katei ka Bolero Pick-up kaba la phet noh na katei ka jaka.
La ong ruh hadien ka jingtohkit ki Pulit, la rah ruh ïa ka met jong utei u rangbah na ka bynta ban pynlong ïa ka Postmortem examination ha Civil Hospital Nongpoh bad hadien ba la pyndep ïa ka Postmortem examination la aiti noh ïa ka met jong une u rangbah sha kiba haïing ba kin pyndep ïa ka jinglehniam ba khatduh ha ka sngi Saitjaiñ ha ka ïingsah jongu, ha ka Shnong Khyndewso.
