Duh lad kamai jakpoh da ki hajar ki longïing naba shah khang tih dewïong ha ka NGT, ïathuh u Lat

Shillong, Rymphang 16: U Lat ka jylla u CH Vijayashankar ula pynpaw ka jingkubur ba ki la don da ki hajar tylli ki longïing kiba la duh ïa ka kamai jakpoh hadien ba khang ka National Green Tribunal (NGT) ïa ka jingtih dewïong thliew khnai, hynrei u la pyntip pat ba ka Meghalaya ka la nang ïaid suki suki sha ka jingtih dewïong da ki kyndon aiñ bad ki stad saïan.
Haba phai sha kane ka jingeh, u Lat u la ong, “Naduh ba ka NGT ka khang ïa ka jingtih dewïong thliew khnai, ba la pynksan da ka Ïingkashari Supreme Court, da ki byllien ngut ki briew kiba shaniah na ka kam tih dewïong kila duh noh ïa ka kamai jakpoh.”
Haba pyntip ïa kane ka jingeh hapoh ka Dorbar Mang Tyngka u la ong, “Ka Sorkar ka la trei khlem shongthait ban wanrah ïa ka jingkylla ha kane ka kam da kaba jam sha ka jingtih dewïong katkum ka juk saïan bad ka rukom tih par kaba neh.”
Haba pynpaw ba kane ka jingpynkylla ïa ka rukom treikam ka la wanrah ïa u soh ka jingkyrmen, u Vijayashankar ula ong, “Lai ngut ki nongthep aplikeshon kila ïoh ïa ka jingmynjur bad kila sdang ïa ka jingtih dewïong katkum ka jingstad saïan, bad ïa u dewïong la shalan ha kylleng ka ri lyngba ki surok bad ki lynti rel.”
“Nalor kane, sa 20 tylli ki aplikeshon lah dep ban phah bad mynta ki don ha ka jingbishar ban ïoh ïa ka jingbit, kaba pyni ïa ka jingjam suki suki sha ka jinglah wanrah biang ïa ka lad kamai jakpoh haba pynthikna ïa ka jingkitkhlieh haba phai sha ka mariang,” ong u Lat.
U Lat u la kren ïa kane hadien ba katto katne sngi ka la mih ka jingjia jingbthei ka par tih dewïong beaiñ ha Mynsngat-Thangsko, East Jaiñtia Hills, ka jingjia kaba ki Liang Pyrshah ki la buh jingkylli haba ïadei bad ki lad ki lynti ban wanrah ïa ka jingshngaiñ.
U Lat ula ïathuh ba ka Sorkar ka la rai ban thung ïa ka Judicial Inquiry Commission hapoh ka commission of Inquiry Act, ban tohkit ïa kane ka jingjia.
Lah ban pynkynmaw ba palat 30 ngut ki nongbylla kila ïap ha ka jingbthei kane ka par dewïong ha Mynsngat-Thangsko.
Haduh mynta, 14 ngut ki briew kila shah kem, ki la don 62 tylli ki ejahar, kynthup ïa 5 tylli hashwa ka jingjia ha Mynsngat-Thangsko, bad ki dei kiba la ujor pyrshah ïa ka jingtih dewïong beaiñ hapoh ka District EJH.
A ïathuh ba ki bor Sorkar ki la kurup haduh 15,224.72 metric ton u dewïong ba la dep shim jingkheiñ nalor ki 25.5 kilo u bomb gelatin bad 74 tylli ki detonator.
Ka Director General of Police (DGP) ka la thung ïa ka kynhun Special Investigation Team (SIT) ban tohkit ïa ka jingbthei kane ka par khnang ban pynthikna ba ka jingtohkit kan poi sha kaba kut bad kaba don jingmut bad ban leh eiei katkum ka aiñ kaba donkam.