Shillong, ïaïong 07: Ka jylla mynta ka sngi, ka la duh noh ïa uwei riew ieit ri ha ka por ba dang Samla bad une udei u Bah Robert Kharshiing. U Bah Robert u la khlad noh ha Nazareth Hospital hadien ba la ban biang ka jingshitom ïa u katto katne por.
U Bah Robert Kharshiing, udei u khun jong u (L) Martin N. Majaw, u MLA bad Myntri barim ka jylla, uba la long u nongsaiñ dur jong ka Land Transfer Act. U Bah Robert, udei shipara bad u Bah John F. Kharshiing, Bah Francis Kharshiing bad Kong Agnes Kharshiing.
U Bah Robert, 63 snem ka rta, u la long teng u MLA ka Laitumkhrah naduh ka snem 1990 haduh 1993, hadien ba u (L) Peter G. Marbañiang u la jop kum u MP sh aLok Sabha. U la long ruh u MP ka Rajya Sabha naduh ka snem 2002 haduh 2008. Ha ka por ba u long MP, u la long ruh u dkhot jong ki Committee bapher bapher ka Parliament. Dei ha ka por jong u ruh ba ïa ka MP Scheme, u la sam ban pynkhlaiñ ïa ki Dorbar Hima bad ki Dorbar Shnong da kaba pynbha ïa ki ïingdorbar Shnong, ki ophis jong ki Hima bad kiwei kiwei.
Ha ka por jong u ruh la pynlong ïa ka People’s Dorbar ha Smit, Mawphlang bad kiwei kiwei de ki jaka, ha kaba kane ka dorbar ka ïakren ïa ki kam pynroi ha ki shnong ki thaw bad shna ruh wat ïa ka mang tyngka ne ka budget da ka jingïarap ka TATA Consultancy. Hynrei ynda la ai sha ka sorkar jylla kam shy pdiang satia.
Ha ka por ba u dang Samla, u la long uwei na ki nongïalam jong ki Samla ha kaba u la long ruh u President ka KSU naduh ka snem 1981 haduh 1984.
Ha ki snem kiba hadien,haba um don shuh bad ka KSU bad u la ong thaw ïa kawei ka kynhun kaba la tip kum ka Democratic Hills Movement ban ïaleh na ka bynta ka hok ki samla bad ki trai ri trai muluk.
Ïa une u rangbah la rah sha ïing jong u kaba don hajan Stephen Hall, Bomfyle Road, Lachumiere.
Na ka liang u Shnongknor ka ïingdorbar Thawaiñ, u Bah Metbah Lyngdoh, u la phah ka khubor sngewlem halor kane ka jingkhlad noh u MLA barim na Laitumkhrah.
