Duh ei ki san ngut ïa ka jingim ha ka jinghap kali ha riat Rngaiñ ha ka miet sngi u Blei

Shillong, Nailar, 04 : Haduh san ngut ki briew kynthup ïa uwei u heprit ba dang shisnem shiteng ki la duhei ïa la ka jong ka jingim hadien ba ka kali kaba ki shong ka la hap ha riat Rngaiñ ha ka miet Sngi U Blei.
Kine ki san ngut ki kynthup ïa ka kmie ka Kong Ellida Marbaniang, 65 snem ka rta bad arngut ki khun shynrang kata u Mebanador Marbaniang 28 snem ka rta bad u Aimeki Marbaniang 23 snem ka rta na ka shnong Lyngkyrdem Laitlyting.
Ha kane ka kali la donlang ruh ka pyrsa kurim jong ka Kong Ellida kaba dei ka kurim jong u Mebanador ka Kong Risbun Kurbah, 22 snem ka rta bad u khun jong u Mebanador uba dang shisnem shiteng kiba dei na Mawpun Rum, East Khasi Hills District.
Mardor na ka liang ka kynhun Search and Rescue team (SRT) hadien ka jingïakhun kaba saw kynta ei ei kata haduh ka por 2:30 baje ei ei mynsngi ki la ïoh ban sei ïa ki ar tylli ki metïap na ka riat Rngaiñ kaba jylliew kumba 100mitar eiei bad ha ka por kumba 3:30-3:45 baje janmiet lah ban ïoh sei sa ïa ki lai tylli ki metïap kata ïa ka met jong u Mebanador Marbaniang, u Aimeki Marbaniang bad jong utei u heprit.
Ki ar tylli ki metïap kiba la sei sha surok ki dei ki metïap jong ki ar ngut ki longkmie kata ka Kong Ellida Marbaniang bad ka kong Risbun Kurbah.
Hadien ba la ïoh sei ïa ki ar tylli ki metïap, ki bahaiing hasem ki la wanrah lypa ïa ki synduk thep ïap ha kane ka jaka. Ki bahaiing jong ka Kong Risbun Kurbah ki la pyntikna ba ïa ka met jong ka Kong Risbun Kurbah bad ïa ka met jong u khun jong ka uba dang shisnem tam yn sa pynkit sha Mawpun Rum kaba don ha ki thaiñ Sohiong.
Ïa ka met jong ka Kong Ellida Marbaniang bad u Aimeki Marbaniang kumjuh ruh ïa u lok jong ka Kong Risbun Kurbah u Bah Mebanador Marbaniang yn sa rah sha shnong kmie jong u sha Lyngkyrdem.
Na ka liang u Bah R Marbaniang haba kren halor kane ka jingjia u la pynpaw ka jingsngewsih kthang hadien ba ka iing ka sem ka la duh noh ïa kine ki baieid bathoin jong ki.
U Rangbah Shnong jong ka shnong Lyngkyrdem, uba la poi sha ka jaka ba jia ka jinghap kali ha riat Rngaiñ u la pynpaw ïa ka jingsngewkhia halor kane ka jingjia da kaba kynnoh ba ka dei hi na ka daw ka jingbym shimkhia jong ka kompeni ban ker lane ban ïada ha ki jaka kiba don jingma.
U la ong ba nangne shakhmat ka shnong ka khmih lynti ba ka kompeni ka dei ban peit bha ban ai jingïada ïa ki paidbah namarba kane ka surok ka long kaba dum bad teng teng haba iaid lynti hap ban ieng shuwa ruh bym ïohi shuh na ka jingrbeng palat u lyoh.
U Block Development Officer (BDO) ka Pynursla C&RD Block u Bah Lamriche Kharmon tang shu ïoh jingtip halor kane u la hiar mar mar ban leit jurip katba ki kynhun ai jingïarap ki dang ïakhun ban sei ïa baroh ki metïap ba dang sah.