Nongpoh, K’lyngkot 09: Ki paidbah ka sor Nongpoh bad ki shnong ba marjan mynta ka sngi ki la hap ban mad ïa ka jingduh bording kaba la bun kynta, kaba dei na ka daw ka jingkhyllem uwei u diengbah ba ki bor ka tnad MeECL ki la hap ban pynlip ïa ka bording khnang ban nym don kano kano ka jingjia ba sngewsih.
Kane ka jingjia ka la jia mynta ka sngi ha ka por 11 baje mynstep ha kaba uwei u diengbah u la khyllem kynsan hajan ka Circuit House Nongpoh, ba ki bor ba dei peit ka tnad MeECL ki la hap ban pynlip noh mardor ïa ka bording ilektrik.
Kumba la ïoh lum jingtip, na ka liang ki nongtrei ka tnad MeECL tang mar ïa ioh jingtip halor ka jingkhyllem utei u diengbah ki la hiar mardor sha katei ka jaka ban pynlip ïa ka bording ilektrik bad ruh ban pynkhuid ïa utei u diengbah uba la pyndkut ïa bun ki sainar ilektrik ha kaba la shim por bun kynta ban pynkhuid bad da ka jingtrei shitom ki nongtrei ka tnad MeECL tang ha ka por janmiet la lah ban ai biang ïa ka bording Ilektrik hapoh ka sorkar Nongpoh.
