Nongstoiñ, Naitung, 18: Ka jingpyllait im ïa ki briew kiba ngat ha kii jingjia ba sngewsih kum ha kaba ngam jyllop ha ki um, ka jingpluh ïing, shah beh thong ha ki riew sniew, shah rahbor bad kiwei kiwei, ki dei ki kam ba kito kiba pyllait im ïa ki para briew kiba ngat ha kiba kum kitei ki jingjia, ki dei kiba la kheiñ duh ïalade na ka bynta ban pyllait ïa ki para mynsiem ba kordor.
Man ka por ka sorkar ka la ju pynkup burom ïa kiba lah ban pyllait im ïa ki para briew, hynrei tang katto katne ngut kiba shah pynkup burom katba lada shim jingkheiñ ki don bun bah kiba la lah ban pyllait im ïa ki para briew na ki jingjia bapher bapher ha kylleng ki shnong hapoh ka jylla.
Ha kaba ïadei bad kane ka mat, ka sorkar ka la dei ban bthah ïa ki bor pynïaid district jong baroh ki khatwei tylli ki district hapoh ka jylla, ba kin bthah ïa ki Block Development Officer ba kin phah wad jingtip man lana u snem na man la ki shnong, la ki don ne em ki jingjia shah pyllait im jong ki mynsiem ba kordor, kiba ngat ha kino kino ki jait jingjia.
Donkam ban buh record ïa ki kyrteng jong ki nongpyllait im na ka bynta ban shna da ki skhim kiba kyrpang, namar teng teng la ithamula ba ïa ki briew kiba la len lade na ka bynta ban pyllait im ïa kiwei, la shu pynkup burom tang da ki memento ki medal bad ki syrnod kiba ïa ryngkat dor tang bad shijur ki juti te kam I don jingmut satia.
Nalor kata la ju ïohi ruh ba ka sorkar ka kham kheiñ kordor ïa kiba wan shakhmat ha ki kam ba ki trei da kaba mang da ki skhim kiba kyrpang na ka bynta jong ki. Katei ka jingleh jong ka sorkar ka long kaba dei, hynrei ka la dei ban pyrkhat kyrpang ruh na ka bynta kiba len lade ban pyllait im ïa ki para briew.
