Shillong, Nohprah 15 : Ka Meghalaya kan sa mih madan ha ka jingïalehkai kaban ïaid saw sngi kaba dei ruh ka jingïalehkai kaba khatduh ha ka lympung ïalehkai Ranji Trophy na ka jingïalehkai plate group pyrshah ïa ka Mizoram bad ka donkam ban jop da 223 ron kaba dang sah sa hynñiew wicket. Hynne ka sngi Palei, u Rajesh Bishnoi uba dei u guest professional jong ka Meghalaya u la ïoh ban khur 5/61 ha ryngkat ka jingïoh khur 4/62 ha ka inning kaba nyngkong.
Haba bteng biang ïa ka 37/3 bad da 81 ron ha ka jinglamkhmat ha ka inning kaba nyngkong, ka Mizoram ka la shah pynhap lut baroh ki wicket ban kamai 216 ron ha ka inning kaba ar, ha kaba ki arngut ki guest professional jong ka ki la ïoh ban lamkhmat ha ka liang ka kamai ron. Ki saw ngut kiwei pat ki rangkawang bol ka Meghalaya kiba la khur wicket hynne ka sngi ki kynthup u Dippu Ch Sangma 2/39, Raj Biswa 1/27, Akash K Choudhary 1/29 bad Abhishek Kumar 1/44.
Haba beh ïa katei ka thong kaba 298 ron u Kishan Lyngdoh u kamai 40 ron bad kamai ron lang da 52 ron ryngkat u Biswa.
