Shillong, Risaw 01: U Myntri Rangbah ka jylla u Conrad K. Sangma u la plie ïa ka Sustainable Land Management Meghalaya Project (SLM) bad plie pyrda ruh ïa ka Protection of Vulnerable Catchment Areas ha Meghalaya (MegARISE) na ka bynta ka tyllong um kaba don ha Umïew ha ka prokram kaba la long ha State Convention Centre, Shillong, ha ka sngi baar ba la pynlong lang da ka Meghalaya Basin Management Agency (MBMA) bad ka Meghalaya Basin Development Authority (MBDA). Kine ki projek ai jingïarap ne kidei ki externally aided projects (EAP) kiba la bei tyngka da ka Germany’s KfW Development Bank bad ka Sorkar jylla.
Ïa kane ka prorkam la shim bynta lang da ka Dr. M. Ampareen Lyngdoh, ka Myntri ka tnat ki kam Rep, bad Dr. Florian Wieneke, Senior Portfolio Manager, KfW Development Bank, Germany, ha ryngkat ki heh ophisar na ka sorkar jylla ba kynthup ïa u Bah Donald Phillips Wahlang, IAS, Chief Secretary, Government of Meghalaya, u Sampath Kumar, IAS, Chief Project Director, MegARISE & Development Commissioner, Government of Meghalaya, ka kong Isawanda Laloo, IAS, Project Director, SLM & Secretary, Agriculture and Farmers’ Welfare, Government of Meghalaya, bad u Gunanka DB, IFS, Additional Project Director, MegARISE & Joint Secretary, Planning, Investment Promotion & Sustainable Development Department, Government of Meghalaya. Ha kane ka prokram la wan ban shim bynta da kumba 400 ngut ki briew, nalor ka kynhun ki nongrep bad kiwei kiwei.
Haba kren ha kane ka sngi u Myntri Rangbah ka jylla u la pynshai halor ka jingdonkam ban pynkup bor ïa ki shnong, ban pynthikna ban pynneh pynsah ïa ka sawdong sawkun. U la pynpaw ba ka Meghalaya ka la ïoh ka jingkyrkhu da ka jingriew spah ha ka jingdon ki khlaw ki btap bad ka jinghiar pateng ha ka kolshor, kaba pynïabiang hapdeng ka kam pynroi bad ka kam pynneh pynsah. U la kdew ba ki projek ba la bei tyngka da ka KfW Development Bank kidei ki jingpyrshang ban wanrah lang ïa kiba bun ki riew pyrkhat, kynthup ïa ki shnat sorkar, ki shnong ki thaw bad kiwei. U la banjur halor ki kam kiba thymmai ban ïarap ïa ki jingeh ba la mad da ki nongrep ha Meghalaya, bad pynpaw ruh ka jingshaniah ba kine ki project kin ai ïa ki tiar kiba donkam bad ban kyrshan ïa ka kam ban kyntiew ïa ki jingpynmih ïa ki marrep.
U la kdew ba ka jingjop ban pyllait ïa ka SLM project bad ka jingplie pyrda ïa ka MegARISE ki la mih na ka jingpynkhreh kaba janai bha mynta lah 5-6 snem. Haba phai pat sha ka ïoh ka kot, u Sangma u la pynpaw ka jingdonkam kaba kyrkieh na ka bynta ka Meghalaya ba kan kiew ka ïoh ka kot jong ka da 12%, da kaba buh thong ban poi sha ka 10 billion economy ha u snem 2028.
U Myntri Rangbah u la pynpaw ka jingsngewhun ban ïohi ba ki projek ki la wandur bad pynpaw ka jingthrang ban ïoh ka jingïatreilang bad ki riewshem phang, ki nongrep bad ki longïing ha ki nongkyndong. U la pynthikna ba ka sorkar jylla kan kyrshan ïa ka KfW bad ki shnat ban pyntreikam ban pynthikna ba kine ki projek yn pyntreikam katkum ka jingthrang bad pynpaw ka jingkyrmen ban ïatreilang bad ka KfW ban kynjoh sha ki thong kumba la angnud.
Katba ka Myntri ka Rep ka Riang ka Dr. M. Ampareen Lyngdoh ka pynpaw ka jingkmen ban ïohsngew ïa ki jingïoh mad ba nyngkong ki nongrep kiba jied ban kren da ka ktien Khasi ïa kiba shim bynta bad pynpaw ruh ka jingsarong ïa ka jingwan jong ki na ki jaka kiba jngai. Ka la banjur ïa ka jingaiti kaba pura jong ka sorkar ban kyrshan ïa ki nongrep bad pynpaw ruh ka jingai khublei ïa ka jingïatrei lang hapdeng ka sorkar jylla bad ka sorkar Germany kaba dei ka ri kaba la kiew kaba ïatreilang bad ka sorkar jylla.
Ka Dr. Lyngdoh ka la khot ïa ka jingïatreilang hapdeng ki nongrep bad ka sorkar jylla ban pynthikna ïa ka lawei kaba bha jong ka pateng ban wan, ban ïada ïa ki khlaw bad kiwei kiwei. Ka la kyntu ïa ki nongrep ba kim dei ban shaniah beit tang ha ka sorkar haba ki mad ki jingeh hynrei ban ïatreilang kum ki paralok, ban shaniah ïa ki jingbei tyngka jong ki ri ka pyrthei kum ka KfW, kaba thmu ban pynkupbor ïa ki nongrep.
Katba u Chief Secretary u Bah Donald Phillips Wahlang, IAS, u la pynpaw ïa ki jingeh ba la mad da ka jylla naduh ba la khang tih dewïong ha u snem 2015 kaba la wanrah ka jingduhnong kaba khraw ïa ka jylla. Ha ka por ba ka sorkar kaba thymmai ka la shimti ha u snem 2018, ka Meghalaya ka la hiar bha ïa ka jingdon ka pla tyngka, hap ïakhun wat ban siew tulop ïa ki nongtrei.
Katba u Dr. Florian Wieneke u la pynpaw ka jingkmen ban ïashim bynta ha kane ka prokram bad banjur ïa ka thong jong ka KfW halor ka jingkylla ka suiñbneng bad ka jingïada ïa ka sawdong sawkun.
