Donkam ka jingïatreilang ki paidbah bad ki pulit ban rat diengkhong ïa u drok: SP

Nongpoh, Jylliew 24: Ka tnad pulit jong ka Ri-Bhoi district mynta ka sngi kala shim bynta ban rakhe ïaka sngi pyrshah drok ne ka International Day against Drugs Abuse and Illicit Trafficking ha District Library Auditorium ban rat diengkhong ïa u drok bad ki jingdih buaid bala jyllei ha kine ki sngi khamtam bun ki khun samla ki shah pynngop ha utei u jingdih buaid.
Ïa katei ka jingrakhe la sdang ruh da ka jingïaid rally naduh madan Pahamsyiem haduh ophis jong u Deputy Commissioner bala shim bynta ruh da ki khynnah skul bapher bapher ka thaiñ Nongpoh ryngkat ki pulit kiba rah ruh ki placard ban pyrta shla halor ka jingma jong u drok bad donkam ban ratdiengkhong khamtam ba ki khun samla ki dei ban ong em ïa u drok.
Ha katei ka sngi la wan ruh ban shim bynta da u Bah MB Tongper Additional Deputy Commissionerka Ri-Bhoi District, Giri Prasad Superintendent of Police Ri-Bhoi District, Bah S Pasleiñ DSP Headquarter, kong E.Kharshandi DSWO, Bah R.Dhar, SDSEO, T.S Sangma DM&HO bad kiwei kiwei ki ophisar haka jingdonlang ki khynnah skul bad nonghikai.
Naka liang ki khynnah skul ha katei ka sngi kila shim bynta ruh haki jingïakop bapher bapher ba kynthup ïa Poster Competition, Extempore Speech bad kiwei kiwei ryngkat ki drama lyngkot bala pyni da ki dkhot jong ka RAWA Umsning halor ka jingma u drok ba ki khun samla kim dei ban ngop bad ngat haka shang khawiah u drok.
Haba kren ha katei ka sngi naka liang u Bah MB Tongper u la ai ka jingïaroh ïaka tnad pulit ha Ri-Bhoi kaba la shimkhia ban pynlong kum kitei ki jait prokram kaba long ka myntoi ïaki khun samla ha kane ka juk kaba mynta kum ka jingai jinghikai bad maham ba ki samla kim dei ban ktah ïa utei u jait jingdih u ba eh pat ban bthat hadien bala kyrni, khamtam ban pyni sha ki samla halor ka jingma bad ka jingktah jong u drok ym tang ïaka koit ka khiah hynrei ïaka imlang ka sahlang baroh kawei.
Namarkata ki khun samla ki dei ban kiar lai lum lai wah na kum kitei ki jait jingdih kiba ktah wat ïaka bor pyrkhat pyrdaiñ, hynrei ban rat diengkhong ïa kum kitei ki jait jingdih naka imlang ka sahlang.
U Giri Prasad Superintendent of Police haba kren ha katei ka sngi la pynpaw ba u drok u dei u jait jingdih bala kynrei bha ha kine ki sngi wat ha ki thaiñ nongkyndong bad dei tang ka jingïatreilang jong ki paidbah naduh ki bor shnong, ki longkmie ki khun samla ryngkat ki bor pulit ban rat diengkhong kum kitei ki jait jingdih haka district bad ki shnong ki thaw, namar lyngba ka jingdoh jong ki nongdih drok bun ki kam sniew ki mih naduh ka tuh ka thiem, ka pyniap briew kaba ktah ïaka imlang ka sahlang.
La pynlong ruh ka jingbam smai ha katei ka sngi ban rat diengkhong bad ban ong em ïa u drok ryngkat ka jingsam khusnam sha ki nongjop haki jingïakop bapher bapher.